Սաուդյան Արաբիայում ռուս-ամերիկյան բանակցությունների բովանդակությունը չի հրապարակվի. Կրեմլ
2 րոպեի ընթերցում
Ռուսաստանի և ԱՄՆ-ի պատվիրակություններն Էր Ռիադում անցկացրել են տեխնիկական խորհրդակցություններ և արդեն զեկույցներ են ուղարկել երկու երկրների ղեկավարություններին, սակայն բանակցությունների բովանդակությունը չի հրապարակվի, հայտնել է ՌԴ նախագահի մամուլի քարտուղար Դմիտրի Պեսկովը։ Այդ մասին «Արմենպրես»-ը տեղեկանում է ՏԱՍՍ գործակալությունից:
«Խոսքն, այնուամենայնիվ, վերաբերում է արդեն տեխնիկական բանակցություններին։ Դրանք այն բանակցություններն են, որոնք խորամուխ են լինում մանրամասնությունների մեջ, ուստի, անշուշտ, այդ բանակցությունների բովանդակությունը հաստատ չի հրապարակվի: Նման բան պետք չէ սպասել», - ասել է Պեսկովը։
«Այժմ մայրաքաղաքներում վերլուծվում են ներկայացված զեկույցները։ Արդեն հետո հնարավոր կլինի խոսել ինչ-որ փոխըմբռնման մասին», - հավելել է Պեսկովը։
Սաուդյան Արաբիայի մայրաքաղաքում մարտի 24-ին տեղի են ունեցել խորհրդակցություններ Ռուսաստանի և ԱՄՆ-ի միջև: Հանդիպումը տևել է ավելի քան 12 ժամ և նվիրված է եղել ռուս-ուկրաինական հակամարտության կարգավորմանն առնչվող որոշ հարցերի։
Ինչպես նշել է ՌԴ նախագահի մամուլի քարտուղարը, Մոսկվան և Վաշինգտոնը կշարունակեն շփումները։
«Ըմբռնում կա, որ շփումները կշարունակվեն, բայց կոնկրետություն առայժմ չկա: Դա կհամաձայնեցվի», - նշել է Կրեմլի ներկայացուցիչը:
Ավելի վաղ ԶԼՆ-ները հաղորդել էին, որ կողմերը մարտի 25-ին ավելի ուշ համատեղ հայտարարություն կհրապարակեն բանակցությունների արդյունքների վերաբերյալ։