ԵԱՀԿ ԽՎ հատուկ ներկայացուցիչը ողջունել է Հայաստանի և Ադրբեջանի միջև խաղաղության համաձայնագրի տեքստի շուրջ բանակցային առաջընթացը
2 րոպեի ընթերցում
Եվրոպայի անվտանգության և համագործակցության կազմակերպության (ԵԱՀԿ) խորհրդարանական վեհաժողովի՝ Հարավային Կովկասում հատուկ ներկայացուցիչ Լուիս Գրասան ողջունել է Հայաստանի և Ադրբեջանի միջև խաղաղության համաձայնագրի շուրջ տեքստի համաձայնեցումը՝ խրախուսելով կողմերին երկխոսությանն ու հաշտեցմանն ուղղված նրանց հանձնառության համար։
«Արմենպրես»-ի հաղորդմամբ՝ այս մասին նշված է ԵԱՀԿ ԽՎ պաշտոնական կայքում հրապարակված հայտարարության մեջ։
Լուիս Գրասան նաև երկու կողմերին քաջալերել է օգտագործել հնարավորությունը և շարունակել աշխատել խաղաղության ուղղությամբ հանուն համագործակցային ապագայի՝ կառուցողական և անկեղծ միջոցներով։
«Այս առաջընթացը կարևոր քայլ է դեպի տարածաշրջանային տևական կայունություն և խաղաղություն։ ԵԱՀԿ խորհրդարանական վեհաժողովը պատրաստ է աջակցել այն նախաձեռնություններին, որոնք նպաստում են տարածաշրջանային կայունությանը, վստահության ամրապնդմանը և տևական հաշտեցմանը Հարավային Կովկասում»,- ասել է Հարավային Կովկասում ԵԱՀԿ ԽՎ-ի հատուկ ներկայացուցիչը:
Հայաստանն ու Ադրբեջանը մարտի 13-ին հայտարարել են, որ վերջնական համաձայնության են հասել խաղաղության համաձայնագրի նախագծի տեքստի շուրջ։ Հայաստանի արտաքին գործերի նախարարությունը հայտարարել է, որ պատրաստ է Բաքվի հետ քննարկումներ սկսել համաձայնագրի ստորագրման ժամկետների և վայրի վերաբերյալ։ Բազմաթիվ երկրներ արդեն ողջունել են Հայաստանի և Ադրբեջանի միջև համաձայնության ձեռքբերումը խաղաղության համաձայնագրի տեքստի շուրջ և հույս են հայտնել, որ այն կստորագրվի հնարավորինս շուտ։