2 րոպեի ընթերցում
Հայաստանի Ազգային ժողովի մարդու իրավունքների պաշտպանության և հանրային հարցերի մշտական հանձնաժողովի նիստում ԿԳՄՍ նախարար Ժաննա Անդրեասյանը ներկայացրեց սփյուռքի կրթամշակութային հաստատություններին աջակցելու ուղղությամբ իրականացվող ծրագրերը։
«Արմենպրես»-ի հաղորդմամբ՝ նախարարը նշեց, որ դասագրքերի տրամադրումը կարևոր բաղադրիչ է սփյուռքի հայ համայնքների կրթական հաստատությունների համար։
«2024 թվականին 298 կրթական հաստատությունների տրամադրել ենք ավելի քան 31 հազար դասագիրք, այդ թվում՝ Վրաստանի դպրոցներին, որտեղ իրականացվում է հայերեն ուսուցում։ Այս տարի ծրագրի ֆինանսավորումը վերականգնվել է, և արդեն հայտեր են ընդունվում տարբեր երկրներից՝ անհրաժեշտ դասագրքերի տրամադրման համար»,- ասեց Անդրեասյանը։
Նա նաև ընդգծեց, որ ստեղծվել է առանձին էլեկտրոնային հարթակ, որտեղ սփյուռքի կրթօջախներին հասանելի են դասագրքերը, և հարթակը շարունակաբար համալրվում է։
«Մենք ամբողջությամբ վերանայել ենք դասագրքերի ցանկը՝ հաշվի առնելով, որ կիրակնօրյա դպրոցներում հայերենի ու պատմության ուսուցման մեթոդաբանությունը պետք է տարբերվի հիմնական կրթությունից»,- հավելեց նախարարը։
ԿԳՄՍ նախարարությունը իրականացնում է նաև սփյուռքի ուսուցիչների վերապատրաստման ծրագիր, որի շրջանակում 2023 թվականին 14 երկրից 60 ուսուցիչներ մեկամսյա վերապատրաստում են անցել Հայաստանում։
«Այս տարի ևս նախատեսվում է իրականացնել ուսուցիչների վերապատրաստման ծրագիր ինչպես Հայաստանում, այնպես էլ հեռավար ձևաչափով՝ ավելի լայն հասանելիություն ապահովելու նպատակով»,- նշեց Անդրեասյանը։