ԵՄ խորհուրդը հավանություն է տվել Ուկրաինային 3,5 միլիարդ եվրոյի հերթական մասնաբաժնի տրամադրմանը
1 րոպեի ընթերցում
Եվրամիության խորհուրդը հավանություն է տվել Ուկրաինային մակրոֆինանսական օգնության՝ 3,5 միլիարդ եվրոյի չափով հերթական մասնաբաժնին, որն ավելի վաղ խոստացել էր Եվրահանձնաժողովը: «Արմենպրես»-ի փոխանցմամբ՝ այդ մասին ասվում է ԵՄ Խորհրդի տարածած հայտարարության մեջ։
Նշվում է, որ այս գումարը կազմում է չվերադարձվող դրամաշնորհների և վարկերի մի մասը և կդառնա ԵՄ-ի կողմից հաստատված երրորդ մասնաբաժինը։ Այս մասնաբաժնի վճարումից հետո Ուկրաինային ԵՄ հիմնադրամից տրամադրված գումարը կկազմի 20 միլիարդ եվրո։
Ըստ հայտարարության՝ երրորդ մասնաբաժինը ստանալու համար Կիևը բավարարել է բոլոր անհրաժեշտ պայմանները, որոնք առաջադրվել են «Ուկրաինայի պլանի» շրջանակներում։ Դրանք ներառում են վերականգնվող էներգիայի օգտագործումն ավելացնելու համար բարեփոխումների անցկացումը, էներգետիկայի ոլորտը կարգավորող մարմնի ինքնիշխանության ավելացումը, սահմանն անցնելու ընթացակարգերի պարզեցումը՝ համաձայն ԵՄ չափանիշների, գյուղատնտեսության զարգացման համար ռազմավարության որդեգրումը և այլն։
«Ուկրաինայի պլանը» սահմանում է Կիևի մտադրությունները՝ կապված երկրի վերականգնման, վերակառուցման և արդիականացման հետ։