1 րոպեի ընթերցում
Դաշնակահար Էմին Քյուրքչյանը, որը հասցրել է ճանաչում ձեռք բերել Իսպանիայում և այլ երկրներում, առաջին անգամ ելույթ կունենա Երևանում։
«Արմենպրես»-ի հաղորդմամբ՝ մենահամերգը տեղի կունենա ապրիլի 2-ին Կոմիտասի անվան կամերային երաժշտության տանը։ Նա կկատարի Սկրյաբինի, Պրոկոֆևի, Լիստի և Շուբերտի ստեղծագործությունները։
Քյուրքչյանի մեկնաբանությունները բնութագրվում են խորը հուզականությամբ և երաժշտական տեքստի նուրբ ըմբռնմամբ, ինչը նրա յուրաքանչյուր կատարում դարձնում է առանձնահատուկ իրադարձություն: Երաժշտագետները նշում են, որ Էմինը հազվագյուտ շնորհ ունի. նրա կատարումը թափանցում է հոգու մեջ և թողնում անջնջելի տպավորություն։ «Սա իսկական ադամանդ է ժամանակակից դաշնամուրային ասպարեզում»,-գրում են երաժշտագետները։
Դաշնակահարը վաղ մանկությունից դրսևորել է յուրահատուկ երաժշտական ունակություններ։ Սովորելով նշանավոր ուսուցիչների մոտ՝ նա կարողացել է իր կատարողական ոճում համադրել նրբագեղությունն ու կիրքը, ինչը նրա նվագն իսկապես անմոռանալի է դարձնում։
Համերգը նախաձեռնել է Artis Futura միջազգային հիմնադրամը։