Բրազիլիան ակնկալում է, որ Երևանի ու Բաքվի միջև խաղաղության գործընթացը հնարավորինս շուտ ավարտին կհասցվի
2 րոպեի ընթերցում
Բրազիլիայի կառավարությունը ողջունել է Հայաստանի և Ադրբեջանի կառավարությունների հայտարարությունը խաղաղության համաձայնագրի շուրջ բանակցությունների ավարտի վերաբերյալ՝ ակնկալելով, որ գործընթացը հնարավորինս շուտ կստորագրվի:
«Արմենպրես»-ի հաղորդմամբ՝ այս մասին համապատասխան հայտարարությունն է տարածել Բրազիլիայի արտաքին գործերի նախարարությունը:
«Բրազիլիայի կառավարությունը ողջունում է Հայաստանի և Ադրբեջանի կառավարությունների համաձայնագրի շուրջ բանակցությունների ավարտի մասին հայտարարությունը, որի իրագործումից հետո կվերականգնվի խաղաղությունը երկրների միջև և կկարգավորվեն երկկողմ հարաբերությունները»,-նշված է հայտարարության մեջ:
Նաև ընդգծվում է, որ Բրազիլիան խրախուսում է կողմերին՝ շարունակել առաջնահերթություն տալ դիվանագիտությանը և երկխոսությանը որպես տևական և կայուն խաղաղության ճանապարհ և ակնկալում է, որ գործընթացը կարող է ավարտվել որքան հնարավոր է շուտ։
Հայաստանն ու Ադրբեջանը մարտի 13-ին հայտարարել են, որ վերջնական համաձայնության են հասել խաղաղության համաձայնագրի նախագծի տեքստի շուրջ։ Հայաստանի արտաքին գործերի նախարարությունը հայտարարել է, որ պատրաստ է Բաքվի հետ քննարկումներ սկսել համաձայնագրի ստորագրման ժամկետների և վայրի վերաբերյալ։ Բազմաթիվ երկրներ արդեն ողջունել են Հայաստանի և Ադրբեջանի միջև համաձայնության ձեռքբերումը խաղաղության համաձայնագրի տեքստի շուրջ և հույս են հայտնել, որ այն կստորագրվի հնարավորինս շուտ։