ՀՆԱ-ում ավելի քան եռապատկվել է բարձր տեխնոլոգիական արդյունաբերության ընկերությունների համախառն արդյունքը. Հակոբ Արշակյան

Հայաստանի Հանրապետության Ազգային ժողովի նախագահի տեղակալ Հակոբ Արշակյանը մասնակցել է Formula VC (Ֆորմուլա ՎիՍի) երկրորդ ֆոնդի պաշտոնական բացման արարողությանը եւ հանդես եկել ողջույնի խոսքով:

Ինչպես «Արմենպրես»-ը տեղեկանում է Ազգային ժողովի տարածած հաղորդագրությունից, ՀՀ ԱԺ փոխնախագահը բարձր է գնահատել միջոցառման նշանակությունը Հայաստանի տեխնոլոգիական ոլորտում: Նա գոհունակությամբ է ընդգծել այն փաստը, որ Ֆորմուլա ՎիՍի-ն երկրորդ էտապին է անցնում, որտեղ տասնյակ միլիոնավոր դոլարների ներդրումներ են կատարվելու Հայաստանի ստարտափ էկոհամակարգի զարգացման մեջ:

«Մենք նաեւ պետք է արձանագրենք, որ վերջին 5 տարիների ընթացքում ՀՆԱ-ում ավելի քան եռապատկվել է բարձր տեխնոլոգիական արդյունաբերության ընկերությունների համախառն արդյունքը: Դա տեխնոլոգիական ոլորտի գործընկերների աշխատանքի, ինչպես նաեւ Կառավարության կողմից կրթության եւ գիտության, բարձր տեխնոլոգիաների ոլորտներում բազմապատիկ ավելի մեծ ջանքերի ու ֆինանսական ներդրումների արդյունքն է»,- փաստել է Հակոբ Արշակյանը:

ԱԺ նախագահի տեղակալի գնահատմամբ՝ վենչուրային կապիտալի կարեւոր բաղադրիչներից է ստեղծարար մտքի խրախուսումը, նաեւ ստեղծարար միտք ունեցող ձեռներեցների ֆինանսական եւ այլ ռիսկերին մասնակից դառնալը:

«Սա նաեւ առաջնորդություն է, որովհետեւ Հայաստանից եւ Սփյուռքից բոլոր այն մարդիկ, որոնք ներգրավված են վենչուրային ֆոնդում, իրենց ձեռքն են մեկնելու նաեւ սկսնակ եւ ոչ այնքան սկսնակ, զարգացող ընկերություններին՝ իրենց գիտելիքներով, փորձով ու միջազգային կապերով: Սա նաեւ այդ կայացած եւ կայացող ընկերությունների համար մեծ հնարավորություններ է ստեղծում միջազգային շուկաներ դուրս գալու առումով»,- ընդգծել է Հակոբ Արշակյանը:

ԱԺ փոխնախագահը համոզմունք է հայտնել, որ ինստիտուցիոնալ ու ստեղծարար միտքը, նոր բիզնես սկսելու եւ տեխնոլոգիական ոլորտում ներդրումներ իրականացնելու պատրաստակամությունը, խրախուսող վենչուրային նոր ֆոնդի ստեղծումը նոր շունչ կհաղորդի ոչ միայն բարձր տեխնոլոգիական ոլորտին, այլ նաեւ այլ բնագավառների զարգացումներին:

Formula VC II ֆոնդի պաշտոնական մեկնարկի միջոցառմանը ողջույնի խոսքեր են հնչեցրել նաեւ ՀՀ փոխվարչապետ Մհեր Գրիգորյանը եւ ՀՀ բարձր տեխնոլոգիական արդյունաբերության նախարար Մխիթար Հայրապետյանը:

Միջոցառմանը ներկա են եղել ներդրողներ, Կառավարության ներկայացուցիչներ, միջազգային գործընկերներ, տեխնոլոգիական համայնքի ներկայացուցիչներ:

Formula VC-ն վենչուրային ֆոնդ է, որը ներդրումներ է անում ստարտափների վաղ փուլերում: Ֆոնդը նպատակ ունի աջակցել հայկական ընկերություններին՝ նրանց օգնելով ընդլայնվել եւ դառնալ միջազգային առաջատարներ: Նոր ֆոնդի շրջանակում 30 միլիոն դոլարի ներդրում կիրականացվի 35-40 տեխնոլոգիական ստարտափում: Formula VC II ֆոնդն իր շուրջն է համախմբել ներդրողների եւ խորհրդատուների աշխարհի ավելի քան 20 երկրից՝ ստեղծելով միջազգային հարթակ հայկական ստարտափների համար՝ անկախ նրանց գտնվելու վայրից: Formula VC-ն գործունեությունը սկսել է 2021 թվականին: