2 րոպեի ընթերցում
«Գավառ համայնքի մասնակցային բյուջետավորում-2025» գործընթացի շրջանակներում Գավառ համայնքի ակտիվ երիտասարդների և երիտասարդական կազմակերպությունների կողմից ներկայացվել են 19 ծրագրեր, որից քվեարկության փուլ են անցել 14-ը, իսկ հաղթող է ճանաչվել 4-ը։
Ինչպես «Արմենպրես»-ին տեղեկացրին Գավառի համայնքապետարանի աշխատակազմից, քվեարկության արդյունքում հաղթող են ճանաչվել «Սպորտ + Ժամանց Գավառում», «Նորատուս բնակավայրի Հ․ Թումանյան փողոցի բարեկարգում», «Կանաչ և բարեկարգ թաղամաս Նորատուսի Պ․ Սևակ փողոցում», «Անվտանգ մանկություն․ Նորատուսի թիվ 2 մանկապարտեզի ցանկապատի վերականգնում» ծրագրերը։
Հաղթող ճանաչված առաջարկները ներկայացվել են գործընթացին և համայնքապետարանի համապատասխան բաժնի և մասնագետների մշակումից հետո նաև պետք է ներկայացվեն Գավառ համայնքի ավագանու հավանությանը, որից հետո, մինչև ապրիլի 1-ը՝ ՀՀ կառավարության լիազոր մարմնին։
«Գավառ համայնքի մասնակցային բյուջետավորում-2025» գործընթացի շրջանակներում իրականացվել են գաղափարների քննարկումներ, ներկայացումներ և հանրային լսումներ։
Գավառ համայնքի ավագանու համապատասխան որոշմամբ Գավառ համայնքի 2024 թվականի բյուջեից տասը միլիոն դրամ է հատկացվել` մասնակցային բյուջետավորման գործընթացն իրականացնելու նպատակով։