Ցավոք, ԼՂ-ում միջազգային մարդասիրական իրավունքը պարտվեց. Ալեն Սիմոնյանը՝ Եվրախորհրդարանի պատգամավորներին
2 րոպեի ընթերցում
Հայաստանի Ազգային ժողովի նախագահ Ալեն Սիմոնյանը շնորհակալություն է հայտնել Եվրոպական խորհրդարանի պատգամավորներին, որոնք իրենց ելույթներում, զեկույցներում դատապարտել են ԼՂ–ի դեմ Ադրբեջանի սանձազերծած պատերազմը, Ադրբեջանում պահվող գերիների փաստը և շատ այլ հարցեր:
«Արմենպրես»-ի հաղորդմամբ՝ Ալեն Սիմոնյանն այս մասին ասաց խորհրդարանում ԵՄ-Հայաստան խորհրդարանական գործընկերության կոմիտեի 4-րդ նիստի ընթացքում:
ԱԺ նախագահը նախ վստահություն հայտնեց, որ առաջիկայում Եվրոպական խորհրդարանի հետ կունենան էլ ավելի սերտ ու արդյունավետ համագործակցություն, քանի որ առկա է քաղաքական ամուր կամք և հայ հանրության պահանջը:
«Կցանկանայի ի դեմս ձեզ շնորհակալություն հայտնել Եվրախորհրդարանի այն պատգամավորներին, որոնք այս տարիներին հետևել են տարածաշրջանում տեղի ունեցող գործընթացներին, Հայաստանի առջև ծառացած մարտահրավերներին, ականջալուր են եղել մեր ահազանգերին և Եվրախորհրդարանի կողմից ընդունված զեկույցներում ու ելույթներում դատապարտել են Լեռնային Ղարաբաղում Ադրբեջանի կողմից սանձազերծված կործանարար պատերազմը, հարյուր հազարից ավելի հայերի բռնի տեղահանումը, Հայաստանի ինքնիշխան տարածքի բռնազավթումը, մարդու իրավունքների կոպտագույն խախտումները, Ադրբեջանում պահվող գերիների փաստը, հայկական մշակութային և կրոնական ժառանգության հանդեպ իրականացված վանդալիզմը: Ցավոք, այդ բոլոր արձագանքները բավարար չեղան, և միջազգային մարդասիրական իրավունքը Լեռնային Ղարաբաղում պարտվեց»,-ասաց Սիմոնյանը: