Չինաստանը դեմ է պաղեստինցիներին Գազայի հատվածից տեղափոխելու գաղափարին

Չինաստանի իշխանություններն անթույլատրելի են համարում Գազայի հատվածի բնակիչներին այլ շրջաններ տեղափոխելու առաջարկները: «Արմենպրես»-ն այս մասին տեղեկանում է «Ինտերֆաքս» գործակալությունից:

«Գազան պատկանում է պաղեստինցիներին և պաղեստինյան տարածքի անբաժանելի մասն է», - ճեպազրույցի ժամանակ հայտարարել է ՉԺՀ արտգործնախարարության ներկայացուցիչ Գո Ցզյակունը։

Արաբական պետությունների լիգայի գլխավոր քարտուղար Ահմեդ Աբուլ Գեյթը վերաբնակեցման մասին ԱՄՆ նախագահ Դոնալդ Թրամփի գաղափարը փետրվարի 12-ին նույնպես համարել է «անընդունելի արաբական աշխարհի համար, որը հարյուր տարի շարունակ պայքարել է այդ գաղափարի դեմ»։

«Մենք՝ արաբներս, ոչ մի դեպքում չենք պատրաստվում հանձնվել հիմա, քանի որ քաղաքական, ռազմական կամ մշակութային պարտություն չենք կրել», - նրա խոսքը մեջբերում են ԶԼՄ-ները։

Հունվարի 25-ից Թրամփն առաջ է քաշել Գազայի պաղեստինցիներին հարևան Եգիպտոս և Հորդանան տեղահանելու ծրագիրը, որը մերժվել է երկու երկրների կողմից։ Դրան միացել են արաբական այլ երկրներ և տարածաշրջանային ու միջազգային բազմաթիվ կազմակերպություններ: 

Հորդանանի Աբդալլահ Երկրորդ թագավորը Վաշինգտոնում Թրամփի հետ կայացած հանդիպման ժամանակ նույնպես ասել է, որ կտրականապես դեմ է հանդես գալիս Գազայի հատվածից պաղեստինցիներին վերաբնակեցնելու նրա գաղափարին։