2 րոպեի ընթերցում
Քաղաքաշինության կոմիտեի նախագահ Եղիազար Վարդանյանը շրջայց է կատարել կոմիտեի համակարգմամբ իրականացվող մի քանի ծրագրերի շինարարական հրապարակներում։
Ինչպես «Արմենպրես»-ը տեղեկանում է Կոմիտեի տարածած հաղորդագրությունից, Լոռու մարզում նա եղել է Վանաձորի N 9 դպրոցում և դիտարկել դպրոցի մարզադահլիճի կառուցման ծրագրի ընթացքը, որն ավարտական փուլում է։
Հաջորդ կանգառը Սպիտակում էր։ Ավարտական փուլում է 144 երեխայի համար նախատեսված մոդուլային մանկապարտեզի կառուցման ծրագիրը։ Սպիտակի մանկապարտեզը կունենա ժամանակակից, մեծ խաղաղահրապարակ՝ արհեստական խոտածածկով, արևային ֆոտովոլտային կայան, ապաստարան՝ հագեցած օդափոխության ժամանակակից համակարգով և դիզել-գեներատորով, ապահովված կլինի ջրամատակարարման և ոռոգման համակարգերով։
Քաղաքաշինության կոմիտեի ղեկավարը Սպիտակ քաղաքում դիտարկել է նաև բնակելի նոր շենքի կառուցման ծրագրի ընթացքը, վերջին այցից հետո կատարված աշխատանքների ծավալը և որակը։ Վթարային փայտյա հանրակացարանային 2 շենքի փոխարեն կառուցվում է 4 մասնաշենքից բաղկացած բազմաբնակարան շենք՝ 36 բնակարանով։
Արագածոտնի մարզում Եղիազար Վարդանյանը հետևել է Ալագյազի «Մոդուլային» տիպի 144 տեղ հզորությամբ, մետաղական կոնստրուկցիաներով մանկապարտեզի կառուցման ծրագրի ընթացքին։
Եղիազար Վարդանյանը կապալառու կազմակերպությունների և Կոմիտեի պատասխանատու ստորաբաժանման ներկայացուցիչների հետ քննարկել է ծրագրերի իրագործման տեմպերը և հայտնել Կոմիտեի պատրաստակամությունն՝ աջակցելու ընթացքում ի հայտ եկող հարցերի՝ սեղմ ժամկետում համատեղ կարգավորմանը։ Նա կարևորել է աշխատանքների բարձր որակով և սահմանված ժամկետներում կատարումը, իսկ ավարտվող ծրագրերի դեպքում՝ վերջնական աշխատանքները կրկնակի պատասխանատվությամբ կատարելու անհրաժեշտությունը։