Մասկի SpaceX ընկերության Starship հրթիռը պայթել է երկնքում՝ ստիպելով ավիաընկերություններին վերաուղղորդել թռիչքները
1 րոպեի ընթերցում
Իլոն Մասկի SpaceX ընկերությանը պատկանող Starship հրթիռը հունվարի 16-ին մեկնարկից րոպեներ անց պայթել է՝ ստիպելով, որ Մեքսիկական ծոցով թռչող ինքնաթիռները փոխեն ուղղությունը, որպեսզի չենթարկվեն բեկորների հարվածի։ «Արմենպրես»-ի փոխանցմամբ՝ այս մասին հաղորդում է Reuters գործակալությունը։
SpaceX-ի նորացված Starship-ը պայթել է մեկնարկից 8 րոպե անց։ Այն պետք է ուղեծիր հասցներ բեռ, որը նմանակում էր արբանյակներ։ Հրթիռում անձնակազմ չի եղել։
Պայթյունի պատճառով այլ օդանավակայաններ են վերաուղղորդվել տասնյակ կոմերցիոն ինքնաթիռներ։ Մոտ 45 րոպեով հետաձգվել են Մայամիի և Ֆլորիդայի օդանավակայաններից մեկնումները։
Իլոն Մասկը հայտնել է, որ ըստ նախնական գնահատումների՝ ձախողման պատճառը եղել է վառելիքի արտահոսքը։
Այս միջադեպը, հնարավոր է, հետաձգի այս տարի Starship հրթիռների առնվազն 12 փորձարկում իրականացնելու՝ Մասկի պլանները։ Հունվարի 16-ին իրականացված փորձարկումը 2023 թվականից ի վեր SpaceX-ի Starship հրթիռի արդեն 7-րդ փորձարկումն էր։