Յուրաքանչյուր խնդրի մասով ՀՀ–ն ունի առաջարկներ. Պաշտպանության նախարարը տարածաշրջանում էսկալացիայի համար հիմքեր չի տեսնում
2 րոպեի ընթերցում
Հայաստանի պաշտպանության նախարար Սուրեն Պապիկյանը հիմքեր չի տեսնում տարածաշրջանում էսկալացիայի համար:
«Արմենպրես»-ի փոխանցմամբ՝ Պապիկյանը նման դիրքորոշում հայտնեց 2024–ն ամփոփող ասուլիսում՝ անդրադառնալով Ադրբեջանի նախագահ Իլհամ Ալիևի՝ այսպես կոչված «Զանգեզուրի միջանցք» բացելու ագրեսիվ հայտարարություններին:
«Հռետորաբանությունը հռետորաբանություն, բայց ցանկացած ագրեսիայի համար պետք են հիմքեր: Իսկ ես՝ որպես պաշտպանության նախարար, չեմ տեսնում, որ կան հիմքեր, որ տարածաշրջանն էսկալացվի, որովհետև յուրաքանչյուր խնդրի մասով Հայաստանն ունի առաջարկներ ու լուծումներ: Եվ կարծում եմ, որ երկխոսությամբ, մեր առաջարկները քննարկելով՝ այդ թվում ըստ անհրաժեշտության ավելի հանրային դարձնելու միջոցով, հնարավոր է, որ մենք կարողանանք մեր մոտեցումները, տարածաշրջանում խաղաղության հասնելու ընկալումները բոլորին հասանելի դարձնել»,–ասաց Պապիկյանը:
Անդրադառնալով հարցին, թե նախորդ օրը ստորագրված հայ–ամերիկյան ռազմավարական գործընկերության մասին փաստաթուղթը որքանո՞վ կարող է երաշխավորել Հայաստանի սահմանների անվտանգությունը՝ նախարարը շեշտեց, որ Հայաստանի սահմանների անվտանգությունը պետք է երաշխավորել բալանասավորված քաղաքականությամբ: Ըստ նրա՝ լուծում չէ բեռը դնել միայն Զինված ուժերի վրա կամ մեկ գործընկերոջ վրա: