1 րոպեի ընթերցում
ԵՐԵՎԱՆ, 9 ՀՈՒՆՎԱՐԻ, ԱՐՄԵՆՊՐԵՍ։ Մոսկվան շահագրգռված է Հարավային Կովկասում խաղաղությամբ, կայունությամբ և անվտանգությամբ և կշարունակի զարգացնել հարաբերություններն ինչպես Երևանի, այնպես էլ Բաքվի հետ։
«Արմենպրես»-ի փոխանցմամբ՝ այս մասին հայտնում է ՏԱՍՍ-ը՝ մեջբերելով Ռուսաստանի Դաշնության նախագահի մամուլի քարտուղար Դմիտրի Պեսկովի հայտարարությունն, ով մեկնաբանել է Հայաստանի և Ադրբեջանի կողմից միմյանց հասցեին հնչող մեղադրանքները տարածաշրջանում լարվածության սրման վերաբերյալ։
Պեսկովն ընդգծել է, որ Հարավային Կովկասը Ռուսաստանի համար հեռավոր տարածաշրջան չէ, և Մոսկվան ցանկանում է, որ Կովկասում լինի խաղաղություն, կայունություն, կանխատեսելիություն, փոխադարձ վստահության և անվտանգության մթնոլորտ:
«Մենք ունենք լավ հարաբերություններ և՛ Ադրբեջանի, և՛ Հայաստանի հետ և գնահատում ենք այդ հարաբերությունները: Եվ մենք մտադիր ենք անել այն ամենն, ինչ կախված է մեզանից, այս հարաբերություններն էլ ավելի զարգացնելու համար»,- ասել է Կրեմլի խոսնակը։
Անդրադառնալով հարցին, թե ՌԴ նախագահ Վլադիմիր Պուտինը վերջերս շփումներ ունեցե՞լ է Ադրբեջանի նախագահ Իլհամ Ալիևի և Հայաստանի վարչապետ Նիկոլ Փաշինյանի հետ՝ Դմիտրի Պեսկովը բացասական պատասխան է տվել։