Այս պահին Հայաստան-Ադրբեջան խաղաղության պայմանագրի 17 հոդվածից 15-ը համաձայնեցվել է․ ԱԳ նախարար
2 րոպեի ընթերցում
ԵՐԵՎԱՆ, 8 ՀՈՒՆՎԱՐԻ, ԱՐՄԵՆՊՐԵՍ։ Հայաստան-Ադրբեջան խաղաղության պայմանագրի շուրջ բանակցությունները շարունակվում են՝ ուղեկցվելով փաստաթղթերի փոխանակմամբ և քննարկումներով։ «Արմենպրես»-ի հաղորդմամբ՝ մամուլի ասուլիսի ժամանակ այս մասին հայտարարեց ՀՀ արտաքին գործերի նախարար Արարատ Միրզոյանը։
«Տարվա ընթացքում եղել են մի շարք փաստաթղթերի և առանձին ձևակերպումների փոխանակումներ։ Եղել են ինչպես պաշտոնական, այնպես էլ ոչ պաշտոնական շփումներ։ Այնուամենայնիվ, մենք դեռ չունենք ստորագրված փաստաթուղթ։ Վերջին առաջարկները մենք ուղարկել ենք ամիս ու կես առաջ և այժմ սպասում ենք ադրբեջանական կողմի արձագանքին»,-ասաց Միրզոյանը։
Նախարարը հիշեցրեց, որ օգոստոսին Հայաստանն առաջարկել է ստորագրել համաձայնեցված 13 հոդված և նախաբանը, սակայն Ադրբեջանը համաձայնություն չի տվել։
«Շարունակեցինք բանակցությունները, և այս պահին 17 քննարկվող հոդվածից համաձայնեցվել է 15-ը։
Տեսնենք, թե ինչպիսին կլինի ադրբեջանական կողմի պատասխանն այդ երկու հոդվածի վերաբերյալ մեր առաջարկների առնչությամբ։
Մենք վստահ ենք, որ փոխընդունելի լուծումներ ենք առաջարկել ադրբեջանական կողմին, լուծումներ, որոնք հնարավորություն կտան ոչ միայն ուղղակի փաստաթուղթ ստորագրել և անցնել առաջ, այլ հնարավորինս հիմնարար և ամբողջական լուծում տալ գոյություն ունեցող խնդիրներին»,-եզրափակեց Միրզոյանը։