Աղավնաձորում ՀՀ-ին վերադարձված 9 մլն 338 հազար դրամ կադաստրային արժեքով հողամասն ամրացվեց Պետգույքի կառավարման կոմիտեին
1 րոպեի ընթերցում
ԵՐԵՎԱՆ, 27 ԴԵԿՏԵՄԲԵՐԻ, ԱՐՄԵՆՊՐԵՍ: Կոտայքի մարզի Աղավնաձոր բնակավայրում գտնվող 0.5 հեկտար մակերեսով հողամասն ամրացվեց Պետական գույքի կառավարման կոմիտեին:
«Արմենպրես»-ի հաղորդմամբ՝ որոշման նախագիծն ընդունվեց ՀՀ կառավարության նիստում:
«Նախատեսվում է Կոտայքի մարզի Աղավնաձոր բնակավայրում գտնվող 0.5 հեկտար մակերեսով հողամասն ամրացնել Պետական գույքի կառավարման կոմիտեին: Գույքը ՀՀ-ին է վերադարձվել հակակոռուպցիոն դատարանի վճռով: Այն անտառածածկ տարածք է, որը 2007 թվականին անտառային ֆոնդից փոխադրվել է հանգստի համար նախատեսված հատուկ նշանակության հողերի կատեգորիա և օտարվել է: Ամրացումից հետո հողամասի հետագա տնօրինումը նախատեսվում է իրականացնել իր իրական նշանակությանը համապատասխան»,-ասաց ՀՀ տարածքային կառավարման և ենթակառուցվածքների նախարար Դավիթ Խուդաթյանը:
Գլխավոր դատախազ Աննա Վարդապետյանն ասաց, որ հակակոռուպցիոն դատարանի 2023թ․ սեպտեբերի 4-ի վճռով բավարարվել է Գլխավոր դատախազության պետական շահերի պաշտպանության գործառույթի շրջանակում ներկայացված հայցը: «Հողամասի կադաստրային արժեքը մոտ 9 մլն 338 հազար դրամ է»,-ասաց Վարդապետյանը:
