ՌԴ-ում կա հստակ քաղաքական կամք՝ պահպանել և նոր մակարդակի բարձրացնել հայ-ռուսական հարաբերությունները. Կոպիրկին
1 րոպեի ընթերցում
ԵՐԵՎԱՆ, 16 ԴԵԿՏԵՄԲԵՐԻ, ԱՐՄԵՆՊՐԵՍ: Ռուսական կողմից կա հստակ քաղաքական կամք՝ պահպանել և նոր մակարդակի բարձրացնել հայ-ռուսական հարաբերությունները:
«Արմենպրես»-ի հաղորդմամբ՝ այս մասին Երևանում ընթացող հայ-ռուսական առողջապահական 9-րդ համաժողովի ժամանակ ասաց Հայաստանում Ռուսաստանի դեսպան Սերգեյ Կոպիրկինը։
«Համաժողովը տեղի է ունենում շատ կարևոր ժամանակաշրջանում, երբ Հայաստանի և Ռուսաստանի համար շատ կարևոր է ոչ միայն պահպանել այն ամենը, ինչ մեզ միավորում է, այլ նաև համագործակցությունը բարձրացնել նոր մակարդակի և հարմարեցնել նոր պահանջներին: Կարող եմ ասել, որ ռուսական կողմից կա հստակ քաղաքական կամք»,- ասաց նա:
Դեսպանի խոսքով՝ երկու երկրների հարաբերությունների ընդհանուր համալիրում առանձնահատուկ տեղ է զբաղեցնում առողջապահության ոլորտը։
«Դեկտեմբերի 20-ին հայ-ռուսական միջկառավարական հանձնաժողովի առաջիկա նիստում կքննարկվեն նաև առողջապահության ոլորտում փոխգործակցության հարցեր և կհամաձայնեցվեն երկու երկրների նախարարությունների միջև մի շարք հարցերի շուրջ պայմանավորվածություններ»,- նշեց դեսպանը: