1 րոպեի ընթերցում
ԵՐԵՎԱՆ, 16 ԴԵԿՏԵՄԲԵՐԻ, ԱՐՄԵՆՊՐԵՍ։ Երևանի քաղաքապետ Տիգրան Ավինյանը հանձնարարեց մշակել քառամյա ծրագիր՝ մայրաքաղաքում օդի որակի բարելավման ուղղությամբ։
«Արմենպրես»-ի հաղորդմամբ՝ քաղաքապետը նշեց, որ մարդածին աղտոտվածության նվազեցման գործում Երևանի քաղաքապետարանը ունի հստակ անելիքներ։
«Առաջարկում եմ քառամյա ծրագիր մշակենք, թե Երևանի քաղաքապետարանն ինչ միջոցներ պետք է ձեռնարկի օդի որակի աղտոտվածության բարելավման ուղղությամբ: Այս ծրագիրը պետք է ներառի ամենապարզ մեթոդները, ինչպիսիք են ծառատունկն ու անտառատունկը՝ թվային հստակ ցուցանիշներով, ինչպես նաև որոշակի սահմանափակումները, օրինակ՝ ժամկետանց մեքենաների շահագործումը Երևանում, որոնք, օրինակ, 2 կմ ծուխ են թողնում իրենց հետևից»,- ասաց Տիգրան Ավինյանը։
Քաղաքապետի խոսքով՝ ծրագիրը պետք է լինի համապարփակ և ընդգրկի բոլոր այն հնարավոր քայլերը, որոնք կօգնեն նվազեցնել օդի աղտոտվածությունը՝ հաշվի առնելով Երևանի քաղաքապետարանի լիազորություններն ու հնարավորությունները։
Նա հանձնարարեց երկու ամսվա ընթացքում ծրագիրը ներկայացնել քաղաքապետարանում։