Պետպատվերով բժշկական ծառայությունների համար նախատեսվող գները կվերանայվեն
2 րոպեի ընթերցում
ԵՐԵՎԱՆ, 13 ԴԵԿՏԵՄԲԵՐԻ, ԱՐՄԵՆՊՐԵՍ: Կվերանայվեն պետպատվերի շրջանակներում բժշկական ծառայությունների համար նախատեսվող գները:
«Արմենպրես»-ի հաղորդմամբ՝ այս մասին լրագրողներին հայտնեց ՀՀ առողջապահության նախարար Անահիտ Ավանեսյանը՝ նշելով, որ բժշկական որոշ ծառայությունների գները բարձրացել են, այդուհանդերձ, համապատասխանում են այն ինքնարժեքին, ինչն օբյեկտիվորեն առկա է:
«Պետք է իրականացվի գների վերանայում, որպեսզի այն գինը, որով պետությունը գնում է ծառայությունը, իսկապես արտահայտի այն ինքնաարժեքը, ինչը մեր դրած ստանդարտով մենք պիտի պահանջենք: Այստեղ շատ կարևոր է, որ ստանդարտը նույնպես ներդրված է: Այս տարի նախարարի հրամանով 300-ից ավելի գործելակարգեր են հաստատվել և ներդրվում են բուժհաստատություններում»,- հավելեց Ավանեսյանը՝ նշելով, որ առկա է որոշ վիրաբուժական ծառայությունների գների վերանայման խնդիր, ինչը փուլ առ փուլ իրականացվում է:
Նրա տեղեկատվությամբ՝ պետպատվերով անհետաձգելի բուժօգնության ծավալի, դեղորայքի ու սպասարկման, ինչպես նաև մանկական բուժսպասարկման հատվածի գներն արդեն վերանայվել են և գալիք տարվա հունվարից կգործարկվեն:
«Շատ կարևոր է, որ երբ գինը բարձրանում է, ապա դա նպաստի նաև ծառայության որակի բարձրացմանն ու կոնկրետ ուղղություններով ծախսվի: Օրինակ՝ ծննդօգնության արժեքները բարձրացրեցինք, փոխեցինք ֆինանսավորման ձևը, հետո հասկացանք, որ ոչ միայն արժեքը պետք է բարձրացնել, այլ նաև կանոնակարգել, թե բժիշկը դրանից որքան աշխատավարձ պիտի ստանա, որպեսզի բարձրացման արդյունքում այնպես չստացվի, որ բուժկենտրոնը միայն շահի, իսկ բժիշկը՝ ոչ»,- ընդգծեց գերատեսչության ղեկավարը՝ նկատելով, որ պետպատվերով բուժհաստատությունը շահույթ է ստանում և կարողանում է իր ծախսերը փակել ոչ միայն կոնկրետ ծառայության փոխհատուցման արդյունքում, այլ նաև՝ ծավալի:
«Մեր գնահատականն է, որ, այո, և՛ ծավալը, և՛ գների փոփոխությունն է այն լուծումը, որ քաղաքացու առջև որևէ հավելյալ գումարի պահանջ չդրվի»,- ընդհանրացրեց նախարարը: