ՀՀ ԱԺ նախագահն ու Նիդեռլանդների նորանշանակ դեսպանը քննարկել են երկկողմ հետաքրքրություն ներկայացնող հարցեր
1 րոպեի ընթերցում
ԵՐԵՎԱՆ, 27 ՆՈՅԵՄԲԵՐԻ, ԱՐՄԵՆՊՐԵՍ: Հայաստանի Հանրապետության Ազգային ժողովի նախագահ Ալեն Սիմոնյանը նոյեմբերի 27-ին ընդունել է Հայաստանում Նիդեռլանդների Թագավորության արտակարգ եւ լիազոր դեսպան Մարիկե Մոնրոյ-Վինթերին:
«Արմենպրես»-ի փոխանցմամբ՝ ԱԺ-ի տարածած հաղորդագրության մեջ նշվում է, որ ողջունելով դեսպանին՝ Ալեն Սիմոնյանը շնորհավորել է նրան կարեւոր հանձնառության ստանձնման կապակցությամբ ու հույս հայտնել, որ վերջինիս դիվանագիտական ծառայության օրոք հայ-նիդեռլանդական հարաբերությունները նոր մակարդակի են հասնելու՝ չբավարարվելով համագործակցության առկա բարձր տեմպերով:
Դեսպան Մոնրոյ-Վինթերն իր հերթին շնորհակալություն է հայտնել ՀՀ ԱԺ նախագահին ընդունելության համար ու պատրաստակամություն հայտնել խորացնելու եւ ընդլայնելու առկա համագործակցությունը:
Զրուցակիցների քննարկումների առանցքում են եղել նաեւ երկկողմ հետաքրքրություն ներկայացնող այլ թեմաներ, այդ թվում՝ Ադրբեջանում պահվող հայ գերիների հայրենադարձության հարցը: