ՀՀ ՊՆ-ն ԶԼՄ-ներին հորդորում է նախքան սպառազինությունների ձեռքբերման մասին նյութեր հրապարակելը ճշտումներ կատարել գերատեսչության հետ
1 րոպեի ընթերցում
ԵՐԵՎԱՆ, 24 ՆՈՅԵՄԲԵՐԻ, ԱՐՄԵՆՊՐԵՍ: Պաշտպանության նախարարությունը, տեղեկատվական անվտանգության պահպանման նկատառմամբ, ԶԼՄ-ներին հորդորում է նախքան սպառազինությունների ձեռքբերման մասին նյութեր հրապարակելը համապատասխան ճշտումներ և ճշգրտումներ կատարել պաշտպանական գերատեսչության հետ: «Արմենպրես»-ի հաղորդմամբ՝ այս մասին ՀՀ ՊՆ-ն հայտարարություն է հրապարակել «Ֆեյսբուք»-ի իր էջում։
«ԶԼՄ հարգելի՛ գործընկերներ, օտարերկրյա լրատվամիջոցներում շարունակում են զետեղվել ՀՀ ԶՈՒ պաշտպանական կարողություններն ընդլայնելու նպատակով սպառազինության ձեռքբերման, ինչպես նաև ձեռքբերման բանակցությունների մանրամասների վերաբերյալ իրականությանը չհամապատասխանող մի շարք հրապարակումներ:
Այդօրինակ հրապարակումներն արագորեն տարածում են գտնում նաև Հայաստանի Հանրապետությունում գործող լրատվամիջոցներում:
Պաշտպանության նախարարությունը, տեղեկատվական անվտանգության պահպանման նկատառմամբ, ևս մեկ անգամ հորդորում է, նախքան նման նյութերը հրապարակելը, համապատասխան ճշտումներ և ճշգրտումներ կատարել պաշտպանական գերատեսչության հետ»,- ասվում է հայտարարության մեջ: