Վարչապետը կարևոր է համարում ոստիկանության կողմից ուժի կիրառման հասկանալի և տեսանելի ստանդարտի ներդրումը

ԵՐԵՎԱՆ, 15 ՆՈՅԵՄԲԵՐԻ, ԱՐՄԵՆՊՐԵՍ։ Հայաստանի Հանրապետության վարչապետ Նիկոլ Փաշինյանը կարևոր է համարում ոստիկանության կողմից ուժի կիրառման հասկանալի և տեսանելի ստանդարտի ներդրումը։

«Արմենպրես»-ի հաղորդմամբ՝ այս մասին վարչապետ Նիկոլ Փաշինյանը խոսեց ՀՀ կառավարության նոյեմբերի 15-ի նիստի ընթացքում։

«Շատ կարևոր է, որ մենք հիմա ոստիկանության բարեփոխումների տրամաբանության մեջ ուժի կիրառման հասկանալի և տեսանելի ստանդարտ ունենանք։ Սա երկու կողմի համար է կարևոր, որովհետև շատ դեպքերում կա մի հարց, երբ ոստիկանությանն ուժ կիրառելու համար առարկություններ են ներկայացվում, շատ դեպքերում  ես զգում եմ, որ ոստիկանները չեն հասկանում՝ ասելով, որ մենք մեր գործն ենք անում։ Ինչ-որ առումով ճիշտ են ասում, բայց ճիշտ են ասում նաև նրանք, ովքեր ասում են, որ դրան պետք է որոշակի ձև, չափ ու սահման լինի։ Այս հարցն ուսումնասիրելով՝ հասկանում ենք, որ մեր երկրում ուժի կիրառման ստանդարտ գոյություն չունի», - ասաց վարչապետը՝ ենթադրելով, որ, գոնե, մի շարք այլ երկրներում այդ ստանդարտները գոյություն ունեն։ 

Վարչապետն այս հարցն ամենակարևորը համարեց՝ նշելով, որ բոլորի համար պետք է պարզ լինի, թե ոստիկանությունը որ դեպքում և ինչ պարագաներում պետք է ուժ կիրառի։