Հայաստանում COP-17 համաժողովի անցկացումը կարևորագույն իրադարձություն կլինի ոչ միայն հայրենի գիտական համայնքի համար
5 րոպեի ընթերցում
ԵՐԵՎԱՆ, 8 ՆՈՅԵՄԲԵՐԻ, ԱՐՄԵՆՊՐԵՍ: Հայաստանում 2026 թվականին կայանալիք «Կենսաբանական բազմազանության մասին» ՄԱԿ-ի կոնվենցիային միացած երկրների 17-րդ համաժողովը ոչ միայն կարևորագույն իրադարձություն կլինի երկրի գիտական կյանքում, այլև մասնագիտական նոր հորիզոնների ուրվագծման հնարավորություն կընձեռի ոլորտի հայ մասնագետներին:
«Արմենպրես»-ի թղթակցի հետ զրույցում, անդրադառնալով COP-17 համաժողովը Հայաստանում անցկացնելու որոշմանը, նշեց կենսաբանական գիտությունների թեկնածու, դոցենտ, ԳԱԱ Արմեն Թախտաջյանի անվան բուսաբանության ինստիտուտի ավագ գիտաշխատող, ԳԱԱ գիտակրթական միջազգային կենտրոնի հետ համատեղ ստեղծված Բույսերի բազմազանության և էկոհամակարգերի ուսումնասիրության ամբիոնի վարիչ Ալլա Ալեքսանյանը:
Հայաստանը COP-17 համաժողովի կազմակերպիչ երկիր է ընտրվել նախորդ շաբաթ Կոլումբիայում տեղի ունեցած համանման միջոցառման ընթացքում: Քվեարկության արդյունքներով Հայաստանը ստացել էր 65 ձայն՝ 7 դրական քվեով շրջանցելով Ադրբեջանին:
«Մեծ պատիվ և պատասխանատվություն է նման խոշոր միջոցառում ընդունելը: Ուզում եմ ընդգծել՝ խոսքը ՄԱԿ-ի երկու ամենախոշոր կոնվենցիաներից մեկի համաժողովի մասին է, որի կազմակերպիչ երկիրը որոշվում է բավականին երկար և բարդ գործընթացի արդյունքում: Նման պատվի արժանանալու համար երկիրը պետք է համապատասխանի որոշակի, ընդ որում՝ բավականին խիստ չափանիշների: Այնպես որ, հաջորդ կոնֆերանսն Հայաստանում անցկացնելու որոշումը լուրջ առաջընթաց և ձեռքբերում է մեր երկրի համար: Դրանում, անշուշտ, որոշ ներդրում ունի նաև Հայաստանի գիտական համայնքը»,- նշեց Ալլա Ալեքսանյանը:
Մեր զրուցակիցն արձանագրեց, որ Հայաստանում նման ներկայացուցչական և հեղինակավոր համաժողովի անցկացումը մեծ պատիվ, նաև հնարավորություն է հայ գիտնականների համար՝ աշխարհին իրենց նվաճումներն ու մոտեցումները ներկայացնելու, առաջատար մասնագետների հետ անմիջականորեն շփվելու, կապեր հաստատելու, փորձի փոխանակման և մասնագիտական նոր հորիզոնների ուրվագծման առումով:
«Այդ ամենը շատ կարևոր ու խիստ անհրաժեշտ է բոլորիս համար: Սա նաև գիտական ուսումնասիրությունների արդյունքները ճիշտ հասցեատիրոջը հասցնելու հրաշալի հնարավորություն է, քանի որ համաշխարհային ընդգրկում ունեցող այդ միջոցառմանն ակնկալվում է շուրջ 10 հազար պատվիրակների, այդ թվում՝ խոշոր գիտականների, տարբեր երկրների կառավարությունների, հասարակական կազմակերպությունների, միջազգային կառույցների ներկայացուցիչների մասնակցություն: Պետք է կարողանանք ճիշտ օգտագործել նման բացառիկ հնարավորությունը»,- գտնում է Ալլա Ալեքսանյանը:
Կենսաբազմազանության պահպանումն ու զարգացումը ոլորտով զբաղվող հայ գիտնականների ուսումնասիրությունների կարևոր ուղղություններից է: Ներկայում իրականացվող ամենախոշոր նախագծերից է «Կենսաբազմազանությունը և կայուն տեղական զարգացումը Հայաստանում» ծրագիրը:
Ալլա Ալեքսանյանը հայտնեց նաև, որ «Վաղ գործողությունների աջակցություն՝ «Կենսաբազմազանության պահպանման գլոբալ շրջանակի» համատեքստում» ծրագրի շրջանակներում ՀՀ Շրջակա միջավայրի նախարարության Բնապահպանական ծրագրերի իրականացման գրասենյակի և ՀՀ Գիտությունների ազգային ակադեմիայի Ա. Թախտաջյանի անվան բուսաբանության ինստիտուտի կողմից ներկայում մշակվում է Հայաստանի կենսաբազմազանության ռազմավարությունը և գործողությունների ազգային ծրագիրը:
ՄԱԿ-ի «Կենսաբազմազանության մասին կոնվենցիան» միջազգային համաձայնագիր է, որը ստորագրվել է 1992 թվականի հունիսի 5-ին՝ Բրազիլիայի Ռիո դե Ժանեյրո քաղաքում: Հայաստանն այն վավերացրել է 1993 թվականին:
Կոնվենցիայի նպատակներն են մոլորակի կենսաբանական բազմազանության պահպանումը, դրա բաղադրիչների կայուն օգտագործումը և գենետիկական ռեսուրսների օգտագործման հետ կապված շահույթի արդար և հավասար բաշխումը, այդ թվում՝ գենետիկական ռեսուրսներին անհրաժեշտ հասանելիության ապահովման և համապատասխան տեխնոլոգիաների հավուր պատշաճի փոխանցման, ինչպես նաև անհրաժեշտ ֆինանսավորման միջոցով։
ՄԱԿ-ի «Կենսաբազմազանության մասին կոնվենցիային» միացած երկրների համաժողովն անցկացվում է երկամյա պարբերականությամբ՝ վերածվելով ոլորտի կարևորագույն խնդիրների և հարցերի քննարկման միջազգային խոշոր հարթակի: