Տրանսպորտի ուղեվարձի չվճարման դեպքեր են արձանագրվել, կկիրառվեն մեթոդներ․ Երևանի քաղաքապետ

ԵՐԵՎԱՆ, 1 ՆՈՅԵՄԲԵՐԻ, ԱՐՄԵՆՊՐԵՍ։ Երևանի քաղաքապետ Տիգրան Ավինյանը խոսեց հասարակական տրանսպորտի ուղեվարձի վճարման հետ կապված խնդիրների մասին։

«Արմենպրես»-ի հաղորդմամբ՝ նոյեմբերի 1-ից հասարակական տրանսպորտից, մասնավորապես MAN, ZhongTong և GazelCity մակնիշի փոխադրամիջոցներից օգտվելիս՝ պարտադիր պայման է 100 դրամանոց մետաղադրամի առկայությունը, կամ ավտոբուսներում և մայրաքաղաքի տարբեր վայրերում տեղադրված վճարային համակարգով QR կոդի միջոցով վճարում իրականացնելը։ 

Թեմայի առնչությամբ Ավինյանը նշեց, որ շատ կարևոր էր այս գործընթացը սկսել միասնական տոմսային համակարգին անցնելուց առաջ, որպեսզի բացահայտեն բոլոր հնարավոր խնդիրները, որոնք կարող են առաջանալ։ 

«Կարծում եմ, որ, ընդհանուր առմամբ, այսօրվա արձանագրված խնդիրները մեզ համար ուղղակի ուղղություններ են աշխատանքում շտկումներ իրականացնելու համար։ Գրանցել ենք, որ շատ դեպքերում տեղի են ունեցել ուղեվարձը չվճարելու դեպքեր, բազմաթիվ նմանատիպ դեպքեր կան։ Այստեղ էլ որոշակի միջոցներ և մեթոդներ կիրառելու ենք։ Դա ունենալու է իր համարժեք հետևանքը»,- ասաց Ավինյանը։

Նրա խոսքով՝  հաջորդ տարվա հունվարի 1-ից կլինի ամբողջական աշխատող միասնական տոմսային համակարգ, և ավտոբուսի ներսում կանխիկ վճարումներ հնարավոր չի լինի անել։ 

«Ավելանալու է նաև բանկային քարտերով վճարումների տարբերակը։ Շուտով թողարկվելու են նաև տրանսպորտային քարտերը, որոնք հաջորդիվ դառնալու են անվանական, որովհետև լինելու են տարբեր խմբեր, որոնք կունենան զեղչային համակարգեր»,- եզրափակեց Ավինյանը։