Վարդաձորում խմելու ջրատարի ներքին ցանցի կառուցման աշխատանքները մոտենում են ավարտին

ԳԱՎԱՌ, 24 ՀՈԿՏԵՄԲԵՐԻ, ԱՐՄԵՆՊՐԵՍ։ Գեղարքունիքի մարզի Մարտունի համայնքի Վարդաձոր գյուղում ՀՀ կառավարության կողմից 2024 թվականին իրականացվող սուբվենցիոն ծրագրերի շրջանակներում ավարտին են մոտենում խմելու ջրատարի ներքին ցանցի կառուցման աշխատանքները։

Ինչպես «Արմենպրես»-ը տեղեկացավ Մարտունու համայնքապետարանի աշխատակազմից, Վարդաձորի խմելու ջրատարի ներքին ցանցի կառուցման ծրագրի պայմանագրային արժեքը կազմում է 39 միլիոն 562 հազար 611 դրամ, որի 75 տոկոսը հատկացնում է ՀՀ կառավարությունը, 25 տոկոսը՝ Մարտունու համայնքապետարանը։ 

Ծրագրով նախատեսված է խմելու ջրատարի ներքին ցանցի կառուցում նորաստեղծ թաղամասում և հին ջրագծերի փոխարինում պոլիէթիլենային նոր խողովակներով։ Կառուցվող ջրատարի ընդհանուր երկարությունը կազմում է 3 կիլոմետր 875 մետր։

Շինարարական աշխատանքները, որոնք  իրականացնում է «Հայկ և Նորիկ» ՍՊԸ-ն, մեկնարկել են օգոստոսին և արդեն կատարվել են շուրջ 90 տոկոսով։ 

Ծրագրի իրականացման արդյունքում Վարդաձոր գյուղի 110 տնտեսություն կապահովվեն որակյալ և շուրջօրյա ջրամատակարարմամբ։

Խոսրով Խլղաթյան