398.97
ԱԺ նախագահը չի տեսնում որևէ պատճառ, որ Ադրբեջանը կարող է հետ կանգնել սահմանազատման հարցով պայմանավորվածություններից
2 րոպեի ընթերցում
ԵՐԵՎԱՆ, 22 ՀՈԿՏԵՄԲԵՐԻ, ԱՐՄԵՆՊՐԵՍ։ Հայաստանի և Ադրբեջանի սահմանազատման հանձնաժողովների կանոնակարգը ադրբեջանական կողմի հետ համաձայնեցված փաստաթուղթ է, և այդ հարցով հայկական կողմն Ադրբեջանի հետ որևէ խոչընդոտի չի հանդիպել։ «Արմենպրես»-ի հաղորդմամբ՝ լրագրողների հետ ճեպազրույցում այս մասին ասաց Ազգային ժողովի նախագահ Ալեն Սիմոնյանը։
Նա նշեց, որ վերջին ժամանակահատվածի քննարկումների ժամանակ ադրբեջանական կողմը վստահեցրել է, որ կանոնակարգը իրենց համար ընդունելի տարբերակ է։
Լրագրողի հարցին, թե մտավախություն չկա՞, որ Ադրբեջանը կանոնակարգը չի վավերացնի, Սիմոնյանը պատասխանեց․
«Մտավախություն միշտ կա, բայց ասում եմ, որ վերջին ժամանակի աշխատանքը, փաստաթղթավորված համաձայնեցումն այս փուլում տեղ չեն տալիս, որ ես մտածեմ, թե նրանք ինչ-որ ձևով կարող են հետ կանգնել համաձայնությունից»։
Հայաստանի խորհրդարանը քննարկում է Հայաստանի և Ադրբեջանի սահմանազատման հանձնաժողովների գործունեության կանոնակարգը վավերացնելու հարցը։ ԱԺ ընդդիմադիր «Հայաստան» և «Պատիվ ունեմ» խմբակցությունները քննարկումից առաջ հայտարարեցին, որ չեմ մասնակցելու կանոնակարգը վավերացնելու հարցի քննարկմանն ու քվեարկությանը։ Ընդդիմադիր պատգամավորները մտահոգություն հայտնեցին, որ Ադրբեջանը կարող է ընդհանրապես հրաժարվել կանոնակարգը վավերացնելուց, ուստի, խնդրահարույց համարեցին, որ Հայաստանը պատրաստվում է վավերացնել այն։
Բաժանորդագրվեք մեր ալիքին Telegram-ում