Երևանի քաղաքապետարանի աշխատակազմի առողջության վարչության պետ Դավիթ Կարապետյանը հանդիպել է ԱՀԿ հայաստանյան գրասենյակի ղեկավար Սիդարթա Դատտայի հետ
2 րոպեի ընթերցում
ԵՐԵՎԱՆ, 26 ՍԵՊՏԵՄԲԵՐԻ, ԱՐՄԵՆՊՐԵՍ: Երևանի քաղաքապետարանի աշխատակազմի առողջության վարչության պետ Դավիթ Կարապետյանը հանդիպել է առողջապահության համաշխարհային կազմակերպության (ԱՀԿ) հայաստանյան գրասենյակի ղեկավար Սիդարթա Դատտայի հետ: Նրան ներկայացվել են քաղաքապետարանի առողջապահության վարչության հիմնական գործառույթները, նպատակները, առողջապահության ոլորտում իրականացվող կառուցվածքային բարեփոխումները:
Ինչպես «Արմենպրես»-ին տեղեկացրին Երևանի քաղաքապետարանից, Դավիթ Կարապետյանը նշել է, որ «Առողջ քաղաք» նախաձեռնության բոլոր ուղղություններով ակտիվ աշխատանքներ կտարվեն:
Ըստ աղբյուրի՝ ԱՀԿ հայաստանյան գրասենյակի ղեկավար Սիդարթան նշել է, որ Երևանը, ունենալով զգալի նվաճումներ մարդու պապիլոմա վիրուսի վարակի դեմ պատվաստումային գործընթացում, «Մեկ երկիր, մեկ պատմություն» խորագրով ընդգրկվել է Եվրոպական տարածաշրջանի 53 երկրների շարքում:
Նշվում է, որ քննարկվել են մի շարք այլ հարցեր՝ առողջապահական առաջնային օղակի զարգացման, շտապբուժօգնության ծառայության արդիականացման, պատվաստումային գործընթացի, թվային առողջապահության համակարգի՝ մասնավորապես, հեռաբժշկության ներդրման և հետագա համատեղ համագործակցության ուղիներին վերաբերող: