ԵՐԵՎԱՆ, 9 ՍԵՊՏԵՄԲԵՐԻ, ԱՐՄԵՆՊՐԵՍ: Հայաստանի ազգային ժողովի նախագահ Ալեն Սիմոնյանը վստահ է, որ գործող իշխանությունը Լեռնային Ղարաբաղի համար արել է այնքան, ինչքան չի արել ՀՀ որևիցե իշխանություն:
«Արմենպրես»-ի հաղորդմամբ՝ Սիմոնյանը նման դիրքորոշում հայտնեց լրագրողների հետ զրույցում:
«Հայաստանի այսօրվա իշխանությունը, որը ոչ թե վերցրեց իշխանությունը, այլ Հայաստանի ժողովրդից ստացավ, Արցախի համար արել է այնքան, ինչքան չի արել որևիցե իշխանություն։ Դրանից հետո տեղի է ունեցել դավադիր պատերազմ, կազմակերպիչները և դրդողները բոլորին արդեն հայտնի են: Մեղադրել իշխանություններին, որը մինչև վերջ պայքարել է Արցախի համար, մինչև վերջ պատերազմ է մղել և արել է ամեն ինչ, տեղին չէ առնվազն 2021 թվականի ընտրություններից հետո, երբ Հայաստանի քաղաքացիները գնացին ու իրենց պատասխանն այդ հարցերին տվեցին: Հայաստանի քաղաքացիները դրա պատասխանը տվել են 2021 թվականին՝ քվեարկելով «Քաղաքացիական պայմանագիր» կուսակցության օգտին՝ տալով 54 տոկոս վստահության քվե»,-ասաց Սիմոնյանը:
Անդրադառնալով Լեռնային Ղարաբաղ միավորման գոյություն վերաբերյալ հարցերին՝ նա նշեց, որ իրավական առումով Լեռնային Ղարաբաղ միավորում գոյություն չունի, կան ԼՂ-ից տեղահանված հայրենակիցներ, որոնց խնդիրներով ՀՀ կառավարությունը, Ալեն Սիմոնյանի գնահատմամբ, զբաղվում է գերազանց ձևով: