2 րոպեի ընթերցում
ԵՐԵՎԱՆ, 5 ՍԵՊՏԵՄԲԵՐԻ, ԱՐՄԵՆՊՐԵՍ։ Ադրբեջանի պաշտպանության նախարարությունը հերթական կեղծ մեղադրանքներն է հնչեցրել Հայաստանի հասցեին՝ հայտարարելով, թե իբր հայկական զինված ուժերը կրակել են ադրբեջանական դիրքերի ուղղությամբ։
«Արմենպրես»-ի փոխանցմամբ՝ Հայաստանի պաշտպանության նախարարությունը հերքել է ադրբեջանական կողմի հերթական կեղծ մեղադրանքները։
«Ադրբեջանի ՊՆ հաղորդագրությունը, թե իբր սեպտեմբերի 5-ին՝ ժամը 09։55-ի սահմաններում, ՀՀ ԶՈՒ ստորաբաժանումները կրակ են բացել սահմանագոտու արևելյան հատվածում տեղակայված ադրբեջանական դիրքերի ուղղությամբ, չի համապատասխանում իրականությանը։
Հիշեցնենք, որ Հայաստանի Հանրապետության վարչապետի աշխատակազմն առաջարկել էր հրադադարի ռեժիմի խախտման դեպքերի և/կամ այդ մասին տեղեկությունների հետաքննության Հայաստան-Ադրբեջան համատեղ մեխանիզմ ստեղծել, ինչին մինչև օրս Ադրբեջանը չի արձագանքել»,- ասված է Հայաստանի պաշտպանության նախարարության տարածած հաղորդագրության մեջ։
Ադրբեջանական կողմը վերջին օրերին պարբերաբար կեղծ լուրեր է տարածում, թե իբր սահմանի տարբեր հատվածներում հայկական զինված ուժերը կրակ են բացում ադրբեջանական դիրքերի ուղղությամբ։ Հայաստանի պաշտպանության նախարարությունը հերքել է ադրբեջանական կողմի տարածած բոլոր նմանատիպ հաղորդագրությունները։