Երևանը հերքել է ադրբեջանական դիրքերի ուղղությամբ կրակ բացելու վերաբերյալ Բաքվի հերթական մեղադրանքները
1 րոպեի ընթերցում
ԵՐԵՎԱՆ, 5 ՍԵՊՏԵՄԲԵՐԻ, ԱՐՄԵՆՊՐԵՍ։ Հայաստանի պաշտպանության նախարարությունը հերքել է ադրբեջանական կողմի հերթական մեղադրանքները հայկական զինված ուժերի կողմից ադրբեջանական դիրքերի ուղղությամբ կրակելու վերաբերյալ։ «Արմենպրես»-ի փոխանցմամբ՝ Հայաստանի պաշտպանության նախարարությունն այդ մասին հաղորդագրություն է տարածել։
«Ադրբեջանի պաշտպանության հաղորդագրությունը, թե իբր սեպտեմբերի 4-ին, ժամը 19։35-ի սահմաններում ՀՀ ԶՈՒ ստորաբաժանումները կրակ են բացել սահմանագոտու հարավարևմտյան հատվածում տեղակայված ադրբեջանական դիրքերի ուղղությամբ, չի համապատասխանում իրականությանը։
Հիշեցնենք, որ Հայաստանի Հանրապետության վարչապետի աշխատակազմն առաջարկել էր հրադադարի ռեժիմի խախտման դեպքերի և/կամ այդ մասին տեղեկությունների հետաքննության Հայաստան-Ադրբեջան համատեղ մեխանիզմ ստեղծել, ինչին մինչև օրս Ադրբեջանը չի արձագանքել»,- ասված է հաղորդագրության մեջ։
Ադրբեջանական կողմը վերջին օրերին պարբերաբար կեղծ լուրեր է տարածում, թե իբր սահմանի տարբեր հատվածներում հայկական զինված ուժերը կրակ են բացում ադրբեջանական դիրքերի ուղղությամբ։ Հայաստանի պաշտպանության նախարարությունը հերքել է ադրբեջանական կողմի տարածած բոլոր նմանատիպ հաղորդագրությունները։