Ջրասույզները Սիցիլիայի ափերին խորտակված զբոսանավից դուրս են բերել 5-րդ զոհի մարմինը
2 րոպեի ընթերցում
![Ջրասույզները Սիցիլիայի ափերին խորտակված զբոսանավից դուրս են բերել 5-րդ զոհի մարմինը](http://armenpress.am/resized/480/storage/images/articles/2024/08/22/CBmQdnYyIqQTn6xsVAwS3M3tYIZ384NftdG7IUt8.webp)
ԵՐԵՎԱՆ, 22 ՕԳՈՍՏՈՍԻ, ԱՐՄԵՆՊՐԵՍ։ Ջրասույզները դուրս են բերել Սիցիլիայի ափերի մոտ օրերս զբոսանավի խորտակվելուց հետո վեց անհետ կորածներից հինգերորդի մարմինը։ Եվս մեկի որոնումները դեռ շարունակվում են։
«Արմենպրես»-ի փոխանցմամբ՝ Reuters-ը, վկայակոչելով իր աղբյուրին, հաղորդում է, որ օգոստոսի 22-ին փրկարարները գտել են ձեռնարկատեր Մայք Լինչի մարմինը։ Նրա 18-ամյա դուստր Հաննան դեռ անհետ կորած է։ Մյուս չորս զոհերի մարմինները դուրս են բերվել օգոստոսի 21-ին։
Բրիտանական դրոշի ներքո նավարկող 56 մետր երկարությամբ Bayesian առագաստանավը, որտեղ եղել է 22 մարդ (12 հյուր և անձնակազմի 10 անդամ), օգոստոսի 19-ի առավոտյան ջրասույզ է եղել է Պալերմո քաղաքից ոչ հեռու։ Նավը խորտակվել է մի քանի րոպեի ընթացքում, փոթորկի պատճառով:
59-ամյա Լինչը Միացյալ Թագավորության տեխնոլոգիական ոլորտի ամենահայտնի ձեռներեցներից մեկն էր և ընկերներին հրավիրել էր միանալ իրեն զբոսանավում՝ նշելու իր արդարացումը ԱՄՆ-ում խարդախության գործով խոշոր դատավարության ժամանակ:
Բացի Լինչից, զոհերի թվում են աշխարհի խոշորագույն ներդրումային բանկերից մեկի՝ Morgan Stanley International-ի տնօրենների խորհրդի նախագահ Ջոնաթան Բլումերը և նրա կին Ջուդին, Clifford Chance ընկերության փաստաբան Քրիս Մորվիլոն և նրա կին Նեդան։
15 մարդ, այդ թվում՝ Լինչի կինը, կարողացել են փրկվել։ Եվս մեկ հոգու՝ նավի շեֆ-խոհարարի մարմինը գտել են աղետից մի քանի ժամ անց։