Հունաստանում հայտարարել են, որ հնագիտական ​​վայրերը չեն տուժել Աթենքի մոտակայքում տեղի ունեցած խոշոր անտառային հրդեհից

ԵՐԵՎԱՆ, 15 ՕԳՈՍՏՈՍԻ, ԱՐՄԵՆՊՐԵՍ։ Հունաստանի մշակույթի նախարարությունը հայտարարել է, որ Մարաթոն, Դիոնիսոս և Նեա Մակրի բնակավայրերի մոտ գտնվող թանգարաններն ու հնագիտական ​​վայրերը չեն տուժել օգոստոսի 11-13-ն Ատտիկայի մետրոպոլիայի հյուսիս-արևելքում տեղի ունեցած խոշոր անտառային հրդեհից։

«Արմենպրես»-ի հաղորդմամբ՝ այս մասին հայտնում է ՏԱՍՍ-ը՝ մեջբերելով Հունաստանի մշակույթի նախարարության հաղորդագրությունը։

«Մշակույթի նախարարության Արևելյան Ատտիկայի հնությունների տեսչության աշխատակիցների ստուգումը ցույց է տվել, որ Ատտիկայում բռնկված հրդեհը որևէ վնաս չի հասցրել Մարաթոնի հնագիտական ​​թանգարանին և Մարաթոնի քաղաքապետարանի հնագիտական ​​վայրերին՝ աթենացիների դամբարանը, եգիպտական ​​աստվածների սրբավայրը Բրեքսիսում, հնագիտական ​​վայրը Նեա Մակրիում: Մարաթոնի հնագիտական ​​թանգարանում հիմնականում պահվում են գտածոներ՝ կապված Մարաթոնի ճակատամարտի հետ, որը տեղի է ունեցել մ.թ.ա. 490 թվականին՝ Հունաստան պարսկական առաջին արշավանքի ժամանակ, ինչպես նաև մոտակայքում կառուցված եգիպտական ​​տաճարի իրեր», - նշվում է հաղորդագրության մեջ։

Աղբյուրը նաև հավելել է, որ Դիոնիսոսի և Ապոլլոնի սրբավայրի ողջ տարածքը, թատերական հրապարակը, գերեզմանները և այլ առարկաներ չեն տուժել, շրջակա կանաչ տարածքները մնացել են անվնաս, քանի որ հրդեհը չի մոտեցել դրանց։

«Նախարարությունը կշարունակի ստուգումները Դիոնիսոսի, Մարաթոնի և Պենտելիի մունիցիպալիտետներում, որտեղ կան նաև ինքնուրույն հնագիտական ​​վայրեր՝ դրանց վիճակն արձանագրելու համար», - նշել է աղբյուրը։

Ատտիկայի հյուսիս-արևելքում բռնկված ուժեղ անտառային հրդեհը երեք օրվա ընթացքում մարվել է ավելի քան 700 հրշեջների կողմից՝ 183 մեքենաներով, իսկ 32 ինքնաթիռ և ուղղաթիռ ջուր է լցրել կրակի վրա: Այնուամենայնիվ, կրակը, բարձրանալով 25 մ, տարածվել է գրեթե 20 կմ: Հրդեհի պատճառով, որը ոչնչացրել է մոտ 10 հազար հեկտար անտառ, կանխարգելիչ նպատակով տարհանվել են տասնյակ բնակավայրեր, մանկական հիվանդանոց և զինվորական հոսպիտալ։ Տեղի ձեռնարկություններից մեկի աշխատակցուհին, ով չի հասցրել փրկվել արագ տարածվող հրդեհից, մահացել է։ Տուժած շրջաններում 78 տուն ճանաչվել է անբնակելի, որոնցից 33-ն ամբողջությամբ այրվել է։