Երևանում Երիտասարդության միջազգային օրվան նվիրված համերգ-ցուցահանդես է անցկացվել ՆԳՆ աշխատակիցների մասնակցությամբ
1 րոպեի ընթերցում
ԵՐԵՎԱՆ, 13 ՕԳՈՍՏՈՍԻ, ԱՐՄԵՆՊՐԵՍ: Ներքին գործերի նախարարությունը Երիտասարդության միջազգային օրվա կապակցությամբ ՀՀ մայրաքաղաքում կազմակերպել է բացօթյա հավաք։
Ինչպես «Արմենպրես»-ին տեղեկացրին ՀՀ ներքին գործերի նախարարության ոստիկանությունից, ՆԳՆ երիտասարդ աշխատակիցները գեղանկարչական ցուցահանդեսով և համերգային ծրագրով ներկայացել են հյուրերին:
Ըստ աղբյուրի՝ ՆԳ նախարարության աշխատակիցներն ու միջոցառման մասնակիցները պարել են հայկական ավանդական պարեր:
Բացօթյա ցուցասրահում ՆԳՆ փրկարար ծառայության և ոստիկանության աշխատակիցները ներկայացրել են իրենց աշխատանքները: Նկարչական հմտություններն են ցուցադրել նաև միջոցառմանը մասնակցող երեխաները:
Նշվում է, որ ծրագիրն իրականացվել է Ներքին գործերի նախարարության մշակույթի կենտրոնի կողմից։