Կրթաթոշակային ծրագիր՝ միջուկային հետազոտությունների ոլորտում կին գիտնականների համար
1 րոպեի ընթերցում
![Կրթաթոշակային ծրագիր՝ միջուկային հետազոտությունների ոլորտում կին գիտնականների համար](http://armenpress.am/resized/480/storage/images/articles/2024/08/12/fgZuYPV4eQvF3uYGUnZKpvFTJPCtbLJRYS7GDzN6.webp)
ԵՐԵՎԱՆ, 12 ՕԳՈՍՏՈՍԻ, ԱՐՄԵՆՊՐԵՍ։ Մեկնարկել է Մարի Սկլադովսկա-Կյուրիի անվան Ատոմային էներգիայի միջազգային գործակալության (ԱԷՄԳ) կրթաթոշակային ծրագրի շրջանակներում տրամադրվող կրթաթոշակների ընթացիկ տարվա մրցույթը:
Ինչպես «Արմենպրես»-ը տեղեկանում է Հայաստանի Հանրապետության կրթության, գիտության, մշակույթի և սպորտի նախարարության տարածած հաղորդագրությունից, ծրագրի նպատակն է խրախուսել երիտասարդ կանանց՝ մասնագիտանալու միջուկային հետազոտությունների և տեխնոլոգիաների ոլորտներում: Ծրագրի շրջանակում ընտրված կին դիմորդներին տրամադրվելու է կրթաթոշակ միջուկային ոլորտի մագիստրոսական ծրագրերով ուսանելու և ԱԷՄԳ աջակցությամբ մինչև 12 ամիս տևողությամբ փորձաշրջան անցնելու նպատակով։
Հայտերի ընդունման վերջնաժամկետը սույն թվականի սեպտեմբերի 30-ն է։ Հայտեր ներկայացնելու մանրամասներին, ինչպես նաև կրթաթոշակային ծրագրի մասին լրացուցիչ տեղեկատվությանը կարելի է ծանոթանալ հետևյալ հղումով։