1 րոպեի ընթերցում
ԵՐԵՎԱՆ, 31 ՀՈՒԼԻՍԻ, ԱՐՄԵՆՊՐԵՍ։ Թեհրանում սպանվել է պաղեստինյան ՀԱՄԱՍ արմատական շարժման քաղաքական բյուրոյի ղեկավար Իսմայիլ Հանիյեն։ «Արմենպրես»-ի փոխանցմամբ՝ այս մասին հաղորդում է Mehr լրատվական գործակալությունը։
Ըստ Իսլամական հեղափոխության պահապանների կորպուսի (ԻՀՊԿ) հայտարարության՝ հարվածը հասցվել է Հանիյեի տանը, նրա հետ միասին սպանվել է նաև նրա թիկնապահներից մեկը։
ԻՀՊԿ-ն հավելել է, որ հարձակման հանգամանքները հետաքննվում են, և դրա արդյունքները կհայտարարվեն ավելի ուշ։
ՀԱՄԱՍ-ի քաղբյուրոյի ղեկավարը Թեհրանում էր՝ Իրանի նախագահ Մասուդ Փեզեշքիանի երդմնակալության արարողությանը մասնակցելու։
Իրանի արտգործնախարարության խոսնակը հայտարարել է, որ Իսմայիլ Հանիյեի սպանությունն ավելի կամրապնդի «Իրանի, Պաղեստինի և դիմադրության միջև խորը և անսասան կապը»։
Հանիյեի սպանությունից, հետո, ըստ Mehr-ի, Իսլամական դիմադրության շարժումը, ՀԱՄԱՍ-ը և պաղեստինյան տարբեր խմբավորումներ կոչ են արել «ցույցեր և համընդհանուր գործադուլներ իրականացրել իսրայելական օկուպացիայի դեմ»։