Ֆեմիննոն և ԱՏՁՄ-ն կհամագործակցեն՝ WCIT2024/DigiTec-ում կանանց մասնակցությունը խթանելու նպատակով

5 րոպեի ընթերցում

ԵՐԵՎԱՆ,30 ՀՈՒԼԻՍԻ, ԱՐՄԵՆՊՐԵՍ: Հայաստանի Առաջատար տեխնոլոգիաների ձեռնարկությունների միությունը (ԱՏՁՄ) փոխըմբռնման հուշագիր է ստորագրել (MoU) Ֆեմիննո մշակութա-նորարարական հարթակի հետ՝ համագործակցելու 2024թ. Նորարարության և Տեխնոլոգիաների համաշխարհային համաժողովի` WCIT2024/DigiTec-ի շրջանակներում կանանց մասնակցության ակտիվացման շուրջ:

«Արմենպրես»-ի փոխանցմամբ՝ կնքված հուշագիրը խորհրդանշում է համագործակցության ձևաչափ, որն ուղղված է կոնգրեսում կանանց ներգրավվածության և մասնակցության խթանմանը՝ ընդգրկելով թե՛ տեղական, թե՛ միջազգային հանրույթն ու համայնքը։ Միավորելով իրենց ռեսուրսներն ու գործընկերների կապերն՝ այս համագործակցությունը նպատակ ունի WCIT2024/DigiTec-ը դարձնելու նշանակալի իրադարձություն՝ հատկանշելով կանանց դերը տեխնոլոգիական ոլորտում՝ Հայաստանը ներկայացնելով նաև որպես կանանց նորարարության և առաջնորդության առաջատար կենտրոն։

WCIT2024//DigiTec-ի կազմկոմիտեի գործադիր տնօրեն Հայկ Կարապետյանը և Ֆեմիննո մշակութա-նորարարական հարթակի հիմնադիր Սեդա Պապոյանը փոխանակվել են հուշագրերով և կարճ ելույթով հայտարարել հուշագրի մասին՝ համատեղ ջանքերով խթանելու WCIT2024/DigiTec-ը։

«Ֆեմիննոյի հետ համագործակցության միջոցով մենք նպատակ ունենք հարստացնել WCIT2024/DigiTec-ի օրակարգը կանանց ավելի մեծ ներկայացվածությամբ: Իմ անձնական փորձից գիտեմ, որ Հայաստանում ընկերություններում ղեկավար պաշտոնների շուրջ 40 տոկոսը զբաղեցնում են կանայք: Այս համագործակցության միջոցով մենք ձգտում ենք հարստացնել մեր միջոցառումը՝ ներգրավելով ավելի շատ մասնագետներ, որոնք քննարկումներին կբերեն իրենց մասնագիտական փորձառությունը: Այս համագործակցությունը երաշխավորում է, որ մեր օրակարգը կլինի ոչ միայն համապարփակ, այլ նաև բազմազան և ներառական, արտացոլելով կանանց իրական ներուժը տեխնոլոգիական ոլորտում»,-ասել է WCIT2024//DigiTec-ի կազմկոմիտեի գործադիր տնօրեն Հայկ Կարապետյանը։ 

Այս համագործակցությունը նպատակ ունի ընդգծելու նաև կոնգրեսի «ԱԲ-ի կանացի հմայքը» («The Grace of AI») հանդիպումների շարքի կարևորությունը, որը նվիրված է գենդերային հավասարության և թվային ոլորտում տնտեսական հզորացման խթանմանը։ Այս գործընկերությունը ցույց է տալիս ավելի ներառական տեխնոլոգիական միջավայրի ստեղծման հանձնառությունը՝ ապահովելով հարթակ, որտեղ կանայք կլինեն առավել ներկայացված ու լսելի։

«Որպես առանձնահատուկ ուղղվածություն ունեցող կազմակերպություն՝ մենք միշտ ձգտում ենք ավելի մեծ ճանաչման և ներկայացվածության: Այսպիսի մասշտաբի միջոցառման հետ համագործակցությունը ոչ միայն համախմբում է մեզ, այլև՝ ուժեղացնում մեր ջանքերը՝ Հայաստանի համար նշանակալի ազդեցություն գրանցելու համար: Այս համագործակցությունը կարևոր քայլ է մեր առաքելությունում՝ ընդլայնելու կանանց  հնարավորություններն ու հասնելու ավելի մեծ արդյունքների»,-ասել է Ֆեմիննո մշակութա-նորարարական հարթակի հիմնադիր Սեդա Պապոյանը։

WCIT2024/DigiTec-ը տեղի կունենա 2024 թվականի հոկտեմբերի 4-7-ին Երևանի Կարեն Դեմիրճյանի անվան մարզահամերգային համալիրում՝ «ՄՏՔԻ ՈՒԺԸ. Արհեստական բանականություն՝ սահմաններից այն կողմ՝ էթիկայի շրջանակներում» խորագրով:

WCIT2024/DigiTec-ը, անցկացման չորս օրերին,  Հայաստանը կվերածվի տեխնոլոգիական մտքի կենտրոնի՝ հանդիսանալով հարթակ ոլորտի և թեմայի շուրջ առաջատար համաշխարհային խոսնակների ելույթների, պանելային քննարկումների և B2B հանդիպումների համար: Համաժողովի շրջանակներում կանցկացվի նաև WITSA World Cup ստարտափների մրցույթը, կներկայացվեն նորարարական ցուցադրություններ, բիզնես ներկայացումներ, սեմինարներ և այլ միջոցառումներ:

WCIT2024/DigiTec համաժողովը կդառնա գլոբալ հարթակ, որը նպատակ ունի`

  • ներկայացնելու հայաստանյան, և ոչ միայն, տեխնոլոգիական ներուժը ԴիջիԹեք էքսպոյի շրջանակներում, որը հանդիսանալու է հիմնական էքսպո հարթակը WCIT2024/DigiTec համար,
  • ուժեղացնելու տեղեկատվական տեխնոլոգիաների ազդեցությունը, իրազեկելու նորարարությունների ու ԱԲ վերջին և ապագա զարգացումների շուրջ,
  • Հայաստանը ներկայացնելու միջազգային հարթակներում և դիրքավորելու որպես նոր տեխնոլոգիական հաբ տարածաշրջանի համար, 
  • խթանելու ներդրումները և ընդգծելու ՏՀՏ լուծումների կարևորությունը տարբեր տարածաշրջաններում և տնտեսություններում:

Համաժողովի օրակարգը ընդգրկում է լայն աշխարհագրությամբ մասնակիցներ՝ ավելի քան 2,000 միջազգային պատվիրակներ կայցելեն Հայաստան միջոցառման օրերին: 

Հայերեն English

Վրաստանում նոյեմբերի 22-ը սգո օր է հայտարարվել՝ գազի պայթյունի հետևանքով մարդկանց զոհվելու կապակցությամբ

Իրանը հերքել է քիմիական և կենսաբանական զենքի մշակման վերաբերյալ ԱՄՆ-ի մեղադրանքները

ՀՀ փոխվարչապետն ու Չեխիայի դեսպանը քննարկել են առևտրի, տրանսպորտի, հանքարդյունաբերության ոլորտներում իրականացվող ծրագրերի ընթացքը

Ռուբինյանը պարզաբանել է, թե ինչու Սահմանադրությունում Անկախության հռչակագրին հղում ներառելը տրամաբանական չի համարում

Երեխաների իրավունքների պաշտպանության ոլորտում դեռևս կան լուծում պահանջող հարցեր․ ՄԻՊ-ի ուղերձը Երեխաների համաշխարհային օրվա առթիվ

Ուկրաինան հրթիռների և ԱԹՍ-ների զանգվածային հարձակման է ենթարկվել

Արտաշատում բացվել է վերակառուցված ու վերազինված պոլիկլինիկա

Հիմնանորոգվել է Ախուրյան, Կառնուտ, Հովիտ, Բասեն և Ջրառատ բնակավայրերը կապող 14 կմ ճանապարհը

ԱԺ նախագահն ընդդիմությանը կոչ է արել չխոչընդոտել սահմանադրական հանրաքվեին և գլխավորել «Ոչ»-ի շտաբը

«Երևանյան բեսթսելեր». «Մայրական կաթ» գիրքն՝ առաջատար. թարգմանական. հոկտեմբեր, 2026