Հայաստանը և Կիպրոսն առաջիկա ամիսներին փոխադարձաբար դեսպանություններ կբացեն 2 երկրների մայրաքաղաքներում
1 րոպեի ընթերցում
ԵՐԵՎԱՆ, 29 ՀՈՒԼԻՍԻ, ԱՐՄԵՆՊՐԵՍ։ Հայաստանը և Կիպրոսն առաջիկա ամիսների ընթացքում փոխադարձաբար դեսպանություններ կբացեն երկու երկրների մայրաքաղաքներում։ «Արմենպրես»-ի փոխանցմամբ՝ Կիպրոսի արտաքին գործերի նախարար Կոնստանտինոս Կոմբոսի հետ համատեղ մամուլի ասուլիսի ընթացքում այս մասին ասել է Հայաստանի արտաքին գործերի նախարար Արարատ Միրզոյանը։
«Ավելորդ է ասել, որ դա լրացուցիչ կնպաստի մեր գործընկերության, ինչպես նաև մարդկանց միջև շփումների ամրապնդմանը»,- ասել է ՀՀ ԱԳ նախարարը:
Միրզոյանն ուրախությամբ արձանագրել է, որ Հայաստանի և Կիպրոսի միջև ապրանքաշրջանառությունը նախորդ տարվա ընթացքում աճել է: «Կարծում եմ, որ դա հենց այն ուղղությունն է, որը մենք կարող ենք և պետք է համատեղ ջանքերով զարգացնենք՝ նոր արդյունքներ նախանշելու և դրական դինամիկայի շարունակությունն ապահովելու համար»,- ասել է ՀՀ ԱԳ նախարարը։