1 րոպեի ընթերցում
ԵՐԵՎԱՆ, 3 ՀՈՒԼԻՍԻ, ԱՐՄԵՆՊՐԵՍ: Վանաձորի Հովհաննես Աբելյանի անվան պետական դրամատիկական թատրոնում առաջնախաղ է սպասվում:
Հանդիսատեսի դատին են հանձնելու Հերբերտ Բերգերի «Մեկ գավաթ էնդորֆին» կատակերգությունը, սակայն ներկայացման պրեմիերան տեղի կունենա ոչ թե թատրոնում, այլ Վանաձորի Կառլոս Աբովյանի անվան կերպարվեստի թանգարանում:
«Արմենպրես»-ի հաղորդմամբ՝ թատրոնի PR պատասխանատու Գոռ Փելեշյանն ասում է՝ նպատակը երկու կառույցների միջև մշակութային կապերի զարգացմանը նպաստելն է:
Առաջնախաղերը տեղի կունենան հուլիսի 23, 25, 29, 30, 31-ին: Նախատեսվում է նաև շրջայց պատկերասրահում, գինու հյուրասիրություն, գինու համտեսի վարպետաց դաս և Կողբի բնաշխարհի գեղարվեստական գործերի ցուցադրություն:
Ներկայացման բեմադրության հեղինակը Ժիրայր Գաբրիելյանն է, երաժշտական ձևավորումը` Հրանտ Վարդումյանի, պարերը` Արման Սաքանյանի: Դերերում` Արման Սաքանյան, Մարիամ Ղևոնդյան, Էդգար Քոչարյան, Նոնա Սաֆարյան, Էդգար Բարսեղյան: