Ռոստովի մարզում ոչնչացվել են քննչական մեկուսարանի աշխատակիցներին պատանդ վերցրած հանցագործները

ԵՐԵՎԱՆ, 16 ՀՈՒՆԻՍԻ, ԱՐՄԵՆՊՐԵՍ: Ռուսաստանի Ռոստովի մարզում գտնվող դաշնային քրեակատարողական ծառայության թիվ 1 քննչական մեկուսարանում պատանդներ պահած հանցագործները  հատուկ գործողության ընթացքում ոչնչացվել են, իսկ  պատանդ պահված աշխատակիցներն ազատ են արձակվել և չեն տուժել։

«Արմենպրես»-ի  հաղորդմամբ՝ տեղեկացնում են ՌԴ Դաշնային քրեակատարողական ծառայությունից:

Ավելի վաղ՝  կառույցը պաշտոնական հաղորդագրություն էր տարածել, որ Ռոստովի մարզում Ռուսաստանի Դաշնային քրեակատարողական ծառայության գլխավոր տնօրինության թիվ 1 քննչական մեկուսարանում արտակարգ դեպքի կապակցությամբ Դաշնային քրեակատարողական ծառայության կենտրոնական գրասենյակի մի խումբ աշխատակիցներ անմիջապես մեկնել են դեպքի վայր՝ տեղում ստուգումներ իրականացնելու  համար։