Իսրայելը հարվածներ է հասցրել «Հեզբոլլահ»-ի ռազմական օբյեկտներին Լիբանանի հարավում
1 րոպեի ընթերցում
![Իսրայելը հարվածներ է հասցրել «Հեզբոլլահ»-ի ռազմական օբյեկտներին Լիբանանի հարավում](http://armenpress.am/resized/480/static/news/b/2024/06/1138593.jpg)
ԵՐԵՎԱՆ, 3 ՀՈՒՆԻՍԻ, ԱՐՄԵՆՊՐԵՍ: Իսրայելի պաշտպանության բանակը (ԻՊԲ) հարվածներ է հասցրել շիաների «Հեզբոլլահ» կազմավորման օբյեկտներին Լիբանանի հարավում։ «Արմենպրես»-ի փոխանցմամբ՝ այս մասին հայտնում է ԻՊԲ մամուլի ծառայությունը։
«Կիրակի գիշերը Իսրայելի պաշտպանության բանակի կործանիչները հարվածներ են հասցրել «Հեզբոլլահ»-ի արձակման կայանքներին և ռազմական օբյեկտներին Լիբանանի հարավի Նաքուրայի, Մարուն էլ Ռասի և Խիամի շրջաններում», - ասված է Telegram-ում ԻՊԲ-ի տարածած հաղորդագրության մեջ:
Լարվածությունը պահպանվում է Իսրայելի հյուսիսային սահմանին։ Հոկտեմբերի 7-ին պաղեստինյան ՀԱՄԱՍ արմատական շարժման զինյալների ներխուժումից հետո Իսրայելը ռազմական գործողություններ է իրականացնում Գազայի հատվածում։ Այս ընթացքում Լիբանանի հարավում գտնվող «Հեզբոլլահ»-ի մարտիկների և իսրայելցի զինվորականների միջև պարբերաբար փոխադարձ հարվածներ են տեղի ունենում։ Երկու երկրների սահմանամերձ շրջաններից տարհանվել են տասնյակ հազարավոր մարդիկ։