Մեծ Բրիտանիան հայտարարել է ՌԴ ռազմական կցորդին արտաքսելու մասին
1 րոպեի ընթերցում
![Մեծ Բրիտանիան հայտարարել է ՌԴ ռազմական կցորդին արտաքսելու մասին](http://armenpress.am/resized/480/static/news/b/2024/05/1136660.jpg)
ԵՐԵՎԱՆ, 8 ՄԱՅԻՍԻ, ԱՐՄԵՆՊՐԵՍ։ Պաշտոնական Լոնդոնը պատրաստվում է արտաքսել Մեծ Բրիտանիայում Ռուսաստանի դեսպանատան ռազմական կցորդին: «Արմենպրես»-ի հաղորդմամբ՝ այդ մասին, վկայակոչելով թագավորության ներքին գործերի նախարար Ջեյմս Քլևերլիին, հայտնում է Интерфакс-ը:
Բրիտանական իշխանությունների նման մտադրության մասին նախարարը հայտարարել է երկրի խորհրդարանում: Նա նշել է նաև, որ Ռուսաստանին պատկանող որոշ օբյեկտներից կհանվի դիվանագիտական սեփականության կարգավիճակը։ Միաժամանակ, Լոնդոնը վիզային սահմանափակումներ կկիրառի ռուս դիվանագետների նկատմամբ: Դա, մասնավորապես, կառնչվի վիզաների վավերականության ժամկետին:
Նման քայլերը Քլևերլին հիմնավորել է Մեծ Բրիտանիայի տարածքում ռուսական հետախուզության դեմ պայքարի անհրաժեշտությամբ: Նախարարի խոսքով՝ թվարկած միջոցները լինելու են «Եվրոպայում, այժմ՝ նաև Մեծ Բրիտանիայում, Ռուսաստանի վտանգավոր գործողությունների» պատասխանը։ Նման գործողությունների թվում նա առանձնացրել է լրտեսության և կիբերհարձակումների ենթադրյալ դեպքերը։