Հասարակական

ՀՀ ՄԻՊ-ն այցելել է Տավուշի մարզ, հանդիպումներ ունեցել սահմանային բնակավայրերի բնակիչների հետ

4 րոպեի ընթերցում

ԵՐԵՎԱՆ, 13 ԱՊՐԻԼԻ, ԱՐՄԵՆՊՐԵՍ։ Հայաստանի Հանրապետության մարդու իրավունքների պաշտպան Անահիտ Մանասյանն ու աշխատակազմի ներկայացուցիչները Տավուշի մարզում հանդիպումներ են ունեցել Մովսես, Ներքին Կարմիրաղբյուր, Բերքաբեր, Ոսկեպար, Ոսկեվան, Կիրանց բնակավայրերի բնակիչների և վարչական ղեկավարների հետ։

Ինչպես «Արմենպրես»-ը տեղեկանում է ՄԻՊ-ի տարածած հաղորդագրությունից, տվյալ համայնքների ղեկավարներն ու բնակիչները Պաշտպանին մտահոգություններ են հայտնել առ այն, որ ադրբեջանական զինվորականների ներկայությունը ՀՀ գյուղերի անմիջական հարևանությամբ կվտանգի իրենց կյանքն ու անվտանգությունը, ֆիզիկական և հոգեկան անձեռնմխելիությունը, կրթության իրավունքը, կզրկվեն իրենց ընտանիքների եկամտի աղբյուր անասնապահությամբ զբաղվելու, արոտավայրերն օգտագործելու հնարավորությունից։ Բացի այդ, սահմանային բնակիչները ներկայացրել են մի շարք խնդիրներ` կապված իրենց սեփականության, կրթության և այլ հիմնական իրավունքներին առնչվող վտանգների հետ։

Պաշտպանը հատուկ ընդգծում է, որ բոլոր գործընթացներում պետության անվտանգության երաշխավորման հետ մեկտեղ պետք է առաջնային լինեն մարդու իրավունքների նկատմամբ հարգանքի երաշխավորումն ու մարդու իրավունքների գերակայության հիմնարար սկզբունքը։

Պաշտպան Անահիտ Մանասյանն ապրիլի 12-ին Իջևանում հանդիպում է ունեցել նաև Տավուշի մարզպետ Հայկ Ղալումյանի հետ, քննարկվել են սահմանային բնակիչների իրավունքների պաշտպանությանը վերաբերելի մի շարք հարցեր: Տավուշի մարզ այցի շրջանակներում Պաշտպանն այցելել է զորամաս, քննարկել զինծառայողների իրավունքների պաշտպանությանն առնչվող առանձին հարցեր:

Միևնույն ժամանակ, սահմանամերձ բնակավայրերի ուղղությամբ կրակոցների առնչությամբ Պաշտպանի աշխատակազմը Մովսես և Ներքին Կարմիրաղբյուր բնակավայրերում հավաքագրել է խախտումները հաստատող փաստեր և ապացույցներ: Առանձնազրույցներ են տեղի ունեցել սահմանային բնակիչների, այդ թվում՝ ադրբեջանական կրակոցների հետևանքով վնասված քաղաքացիական ենթակառուցվածքների սեփականատերերի հետ։

Պաշտպանը ևս մեկ անգամ ընդգծում է, որ ՀՀ գյուղերի անմիջական հարևանությամբ ադրբեջանական զինված ուժերի կրակոցները կրում են նաև խաղաղ բնակչությանն ահաբեկելու, մշտապես սթրեսային և տագնապային վիճակում պահելու նպատակ։ Այդ գործողությունները կոպտորեն ոտնահարում են միջազգային իրավունքի սկզբունքները, իրական վտանգ են ներկայացնում քաղաքացիական բնակչության կյանքի իրավունքի և անվտանգության, արժանապատիվ պայմաններում ապրելու, ինչպես նաև մյուս հիմնարար իրավունքների ապահովման տեսանկյունից:

ՄԻՊ-ի տարածած հաղորդագրության մեջ նշվում է, որ այցի շրջանակներում Տավուշի մարզի սահմանային բնակիչների կողմից բարձրացված խնդիրներն ու Պաշտպանին ներկայացված մտահոգությունները, ինչպես նաև իրականացված փաստահավաք աշխատանքների ընթացքում հավաքագրված փաստերն ամփոփվելու են Մարդու իրավունքների պաշտպանի աշխատակազմում։ Դրանք կներկայացվեն ՀՀ պետական իրավասու մարմիններին, ինչպես նաև միջազգային կազմակերպություններին և այլ դերակատարներին:

Մարդու իրավունքների պաշտպանի աշխատակազմն, այդ թվում` Տավուշի մարզային ստորաբաժանումը, շարունակում է մշտադիտարկումն ու աշխատանքները սահմանամերձ բնակավայրում:

Հայերեն

ՀՀ-ում Ռուսաստանի դեսպանությունը ցավակցել է Ճամբարակում շենքի պայթյունի հետևանքով զոհվածների հարազատներին

Իրանը առայժմ չի քննարկում ավելորդ միջուկային նյութերի հեռացման հարցը

Պարեկները Լոռում և Տավուշում մեկօրյա ուժեղացված ծառայության ընթացքում արձանագրել են 458 խախտում

Առինջում հրդեհի բռնկմամբ ՃՏՊ- հետևանքով տուժել է երեք մարդ

Թուրքիայում Ռուսաստանի դեսպանը հայտնել է դիվանագիտական առաքելությունն ավարտելու մասին

ԱՄՆ-ն արդեն այս ամառ կարող է զրկվել իր պետական ​​պարտքը սպասարկելու հնարավորությունից

Վրաստանը նպատակ ունի անդամակցել ԵՄ-ին և վերագործարկել հարաբերությունները Բրյուսելի հետ․ Կոբախիձե

Մահացել է Beach Boys խմբի հիմնադիր Բրայան Ուիլսոնը

ՃՇՀԱՀ-ի ուսանողուհիները հաջողություններ են գրանցել Չինաստանում կայացած «Թվային ինտերակտիվ մեդիա դիզայն» հմտության մրցույթում

Ռուսաստանի և Ուզբեկստանի նախագահները քննարկել են տնտեսական նախագծերի իրականացմանը վերաբերող հարցեր