3 րոպեի ընթերցում
ԵՐԵՎԱՆ, 23 ՕԳՈՍՏՈՍԻ, ԱՐՄԵՆՊՐԵՍ: Վայոց ձորի նախկին մարզպետ, Սահմանադրական դատարանի աշխատակազմի նախկին ղեկավար Էդգար Ղազարյանի նախաձեռնությամբ Հանրապետության հրապարակում տեղի ունեցավ հանրահավաք: Ինչպես տեղեկացնում է «Արմենպրես»-ը, Էդգար Ղազարյանը դեռևս օգոստոսի 10-ին հայտարարել էր «Անկախության շարժում» նախաձեռնության ստեղծման մասին և օգոստոսի 23-ին քաղաքացիներին հրավիրել հանրահավաքի:
Հանրահավաքից առաջ լրագրողների հետ ճեպազրույցում Էդգար Ղազարյանը հայտնեց, որ մտադիր է դիմել ՀՀ վարչապետ Նիկոլ Փաշինյանի աշխատակազմին Կառավարության ղեկավարի հետ հանդիպում կազմակերպելու առաջարկով։
Էդգար Ղազարյանը հանրահավաքի ժամանակ ներկայացրեց այն բոլոր ճանապարհները, որով, ըստ իրեն, հնարավոր է հասնել վարչապետ Նիկոլ Փաշինյանի հրաժարականին:
«Մեր պայքարը պետք է գնա Ազգային ժողով, և Ազգային ժողովը պետք է անվստահություն հայտնի վարչապետ Նիկոլ Փաշինյանին: Եվ դա պետք է լինի առնվազն առաջիկա օրերին: Հապաղել պետք չէ: Ես ձեզ հաջորդ հանրահավաքի կոչ կանեմ միայն ու միայն Ազգային ժողովի բակում, միայն այն օրը, երբ կքննարկվի նոր վարչապետի ընտրության հարցը: Իսկ հիմա կսպասենք պատգամավորների գործունեությանը և նրանց որոշումներին»,- ելույթի ժամանակ նշեց Ղազարյանը: Հանրահավաքի կազմակերպիչը հավաքված մի խումբ քաղաքացիներին ասաց, որ իրենից պետք չէ ակնկալել ուժի գործողություն, ինքը չի պատրաստվում շենքեր գրոհել:
«Խնդրում եմ լիազորեք ինձ հանդիպելու Հայաստանի բոլոր քաղաքական գործիչների, հասարակական կազմակերպությունների ներկայացուցիչների և քաղաքացիների հետ՝ կարճ ժամանակում պահանջել նրանցից որոշում՝ գնալ առաջ: Առաջադրեք վարչապետի թեկնածու, եթե չունեք ձեր թեկնածուին, ինձ առաջադրեք»,- նշեց Ղազարյանը:
Հանրահավաքի ընթացքում Էդգար Ղազարյանը փորձեց հանդիպել վարչապետ Նիկոլ Փաշինյանի հետ, սակայն դա նրան չհաջողվեց, քանի որ ոստիկանության աշխատակիցները տեղեկացրել էին, որ աշխատանքային ժամն ավարտվել է և չկա որևէ պատասխանատու անձ, որը կարող է ընդունելություն կազմակերպել կամ պատասխանել հարցերին։ Ելույթի վերջում Ղազարյանն հայտնեց, որ հաջորդ հանրահավաքը տեղի կունենա Ազգային ժողովում, երբ տեղի ունենա նոր վարչապետի ընտրությունը: