Իշխան Սաղաթելյանն ընդդիմության ակցիաներում կազմակերպվածության նոր մակարդակի անհրաժեշտություն է տեսնում

ԵՐԵՎԱՆ, 5 ՄԱՅԻՍԻ, ԱՐՄԵՆՊՐԵՍ: Ընդդիմությունը շարունակում է ակցիաները, երթերն ու հանրահավաքները, Երևանի Ֆրանսիայի հրապարակը շարունակում է փակ մնալ:

«Արմենպրես»-ի հաղորդմամբ՝ մայիսի 5-ին օրվա ընթացքում հանրապետությունում անհնազանդության ակցիաներ, երթեր են իրականացվել, մասնակիցները փակել են ճանապարհներ, փողոցներ, ոստիկանները բերման են ենթարկել քաղաքացիների:

Երեկոյան արդեն Ֆրանսիայի հրապարակում հարթակից ելույթ ունեցավ ՀՅԴ գերագույն մարմնի ներկայացուցիչ Իշխան Սաղաթելյանը: Նախ մեկ րոպե լռությամբ հարգեցին Ֆրանսիայի հրապարակում տեղադրված վրաններից մեկում սրտի կաթվածից մահացած քաղաքացու հիշատակը:

Իշխան Սաղաթելյանը հայտարարեց՝ պահանջում են, որ Ֆրանսիայի հրապարակի տարածքում մշտապես լինի Շտապօգնության մեքենա` ապահովելու քաղաքացիների՝ առողջության հետ կապված հարցերը:

«Մենք պայքարի ենք դուրս եկել, գիտենք, թե ինչի համար, ինչ նպատակով»,-նշեց Սաղաթելյանը:

Ապա մասնակիցները սկսեցին Սայաթ Նովա փողոցով երթ իրականացրել: Երթի մասնակիցները կանգ առան ոստիկանության շենքի առջև, որտեղ կրկին ելույթ ունեցավ Իշխան Սաղաթելյանը: Ըստ նրա՝ ոստիկաններն օրվա ընթացքում անհամաչափ ուժ են կիրառել քաղաքացիների նկատմամբ, Սաղաթելյանը կոչ արեց վերջ տալ դրան: «Մենք այսօրվանից ֆիքսում ենք այն դեմքերը, որոնք քաղաքացիների նկատմամբ բռնություններ են գործադրում»,-նշեց նա:

Ելույթ ունեցավ նաև «Հայաստան» խմբակցության պատգամավոր Արամ Վարդևանյանը՝ դիմելով կրկին ոստիկաններին, հիշեցնելով հավաքների ազատության իրավունքի մասին:

Ապա երթի մասնակիցները վերադարձան Ֆրանսիայի հրապարակ, որտեղ ընդդիմադիրները կոչ արեցին քաղաքացիներին տների պատշգամբներից, լուսամուտներից Հայաստանի և Արցախի դրոշներ կախել՝ ի նշան աջակցության:

Ըստ Իշխան Սաղաթելյանի` պետք է կազմակերպվածության նոր մակարդակ, պետք է մասնակիցների թիվն ավելացնել: Նա վստահություն հայտնեց, որ ընդդիմության նպատակին հասնելու օրը մոտ է: «Մենք պետք է հասնենք նրան, որ ամբողջությամբ լինենք իրադրության տերը: Այս հրապարակի հետ բոլորը պետք է հաշվի նստեն»,-ասաց նա:

Սաղաթելյանը հորդորեց մայիսի 6-ին ամբողջ Երևանը պարալիզացնել, ժամը 12:00-ին հավաքվել Ֆրանսիայի հրապարակում, բաժանվել 4 մասի և մայրաքաղաքի մեծ մասն ամբողջությամբ պարալիզացնել: Նրա խոսքով՝ անհնազանդության երթերը պետք է լինեն շատ մեծ քանակությամբ, որ ոստիկանները չկարողանան բերման ենթարկել քաղաքացիներին: Շաբաթ օրը՝ մայիսի 7-ին խոշոր ավտոերթով գնալու են քաղաքներից մեկը՝ մարզային բնակչությանն ակտիվացնելու, համախմբելու և միասին Երևան գալու: