2 րոպեի ընթերցում
ԵՐԵՎԱՆ, 14 ՓԵՏՐՎԱՐԻ, ԱՐՄԵՆՊՐԵՍ: Ռուսաստանի արտաքին գործերի նախարար Սերգեյ Լավրովը Ռուսաստանի նախագահ Վլադիմիր Պուտինի հետ հանդիպման ժամանակ հայտարարել է, որ անվտանգության հարցով Ռուսաստանի Դաշնության առանցքային առաջարկների վերաբերյալ ԱՄՆ պատասխանը բացասական է:
«Մեզ ուղարկել են ԱՄՆ-ի և ՆԱՏՕ-ի պատասխանը: Մենք այդ պատասխանները ուշադիր ուսումնասիրել ենք միջգերատեսչական ձևաչափով՝ մեր գործընկերների հետ միասին: ԱՄՆ - ի պատասխանը մեզ առաջին հերթին հետաքրքրում է, քանի որ բոլորի համար պարզ է, թե ով է գլխավոր դերակատարն այդ հարցերի լուծման գործում», - «Արմենպրես»-ի հաղորդմամբ` ասել Լավրովը:
Ռուսաստանի ԱԳ նախարարի խոսքով ՝ Ռուսաստանի կողմից առաջ քաշված առանցքային խնդիրների շուրջ (ՆԱՏՕ-ի ընդլայնման անթույլատրելիությունը, հարվածային սպառազինությունների տեղակայման արգելքը և Եվրոպայում ռազմաքաղաքական կոնֆիգուրացիայի վերադարձը 1997 թվականի դիրքի) պատասխանը բացասական է:
«Մեզ,իհարկե, դա բավարարել չի կարող»,- հավելել է նախարարը:
ՌԴ ԱԳ նախարարը նշել է, որ անվտանգության երաշխիքների վերաբերյալ ԱՄՆ - ի պատասխանի առաջին մասը Ռուսաստանին չի բավարարում, երկրորդը՝ ավելի կառուցողական է:
Լավրովը հավելել է, որ ԱՄՆ-ն և ՆԱՏՕ-ն պատրաստ են լուրջ բանակցություններ սկսել ՌԴ-ի հետ անվտանգության երաշխիքների որոշ բնագավառների շուրջ:
Նա հստակեցրել է, որ անվտանգության երաշխիքների հարցով ԱՄՆ-ի պատասխանի մի մասը համընկնում է այն առաջարկների հետ, որոնք ավելի վաղ հնչեցրել էր Մոսկվան: