3 րոպեի ընթերցում
ԵՐԵՎԱՆ, 10 ԴԵԿՏԵՄԲԵՐԻ, ԱՐՄԵՆՊՐԵՍ: Թուրքիայում գործող «Հասարակական-քաղաքական դաշտի հետազոտությունների կենտրոն»-ը Ստամբուլ, Իզմիր, Անկարա, Քոնիա, Սամսուն, Տրապիզոն, Բուրսա, Մուղլա, Անթալիա, Ադանա, Մերսին, Էրզրում, Աղրի, Կարս, Դիարբեքիր, Շանլըուրֆա, Մարդին, Բաթման, Վան և Սիիրթ քաղաքների 1876 քաղաքացիների շրջանում սոցհարցում է անցկացրել, որի համաձայն՝ հարցվածների 56,9 տոկոսը կողմ է արտահայտվել արտահերթ ընտրություններին, 24,2-ը՝ դեմ:
Այս մասին, ինչպես հաղորդում է «Արմենպրես»-ը, հայտնում է թուրքական demokrathaber.org-ը:
Հարցման համաձայն՝ Թուրքիայում իշխող «Ժողովրդական դաշինք»-ի և ընդդիմադիր «Ազգային դաշինք»-ի ուժերի միջև ձայների տարբերությունը կազմել է 0,6 տոկոս:
Հնարավոր ընտրություններում իշխող Արդարություն և զագացում կուսակցությանը (AKP) ձայն տալու պատրաստակամություն է հայտնել 32,8 տոկոսը, գլխավոր ընդդիմադիր «Ժողովրդահանրապետական» կուսակցության (CHP) օգտին՝ 27,8-ը, ընդդիմադիր «Լավ» IYI կուսակցության օգտին՝ 12,5-ը, ընդդիմադիր «Ժողովուրդների դեմոկրատական» կուսակցության (HDP) օգտին՝ 11,5-ը, իշխող կոալիցիայում ներառված «Ազգայնական շարժում» (MHP) օգտին՝ 7,6-ը։
Թուրքիայում գործող «AREA Araştırma» կազմակերպության կողմից նոյեմբեր ամսին իրականացված սոցհարցման արդյունքների համաձայն՝ Թուրքիայում իշխող «Ժողովրդական դաշինք»-ի վարկանիշը, որում ընդգրկված են «Արդարություն և Զարգացում» (AKP) և «Ազգայնական շարժում» (MHP) կուսակցությունները, շարունակել էր անկում ապրել:
Իշխող «Ժողովրդական դաշինք»-ի ուժերի օգտին պատասխանած քաղաքացիները կազմել էին 39,1 տոկոս, իսկ ընդդիմադիր «Ազգային դաշինք»-ի ուժերի օգտին պատասխանածները՝ 42,2 տոկոս:
Թուրքիայի խորհրդարանում ներկայացված ընդդիմադիր «Ժողովուրդների դեմոկրատական» կուսակցության օգտին հանդես եկածները կազմել էին 10 տոկոս:
Այսպիսով` արդյունքներով Թուրքիայում իշխող կոալիցիան զիջում էր ընդդիմությանը:
Թուրքիայում գործող «Սոցիալական-քաղաքական հետազոտությունների կենտրոն»-ի կողմից սեպտեմբեր ամսին իրականացված սոցհարցումների արդյունքների համաձայն՝ Թուրքիայում իշխող կոալիցիայում ընդգրկված ուժերի՝ «Արդարություն և Զարգացում» (AKP) և «Ազգայնական շարժում» (AKP) կուսակցությունների վարկանիշը կրկին ցածր էր եղել:
