Արդարացում չկա. փոխնախարարը վստահեցնում է՝ Աբովյանի դիահերձարանի դեպքը համակարգային բնույթ չի կրում

ԵՐԵՎԱՆ, 3 ՀՈՒՆԻՍԻ, ԱՐՄԵՆՊՐԵՍ: ՀՀ առողջապահության փոխնախարար Գևորգ Սիմոնյանը Աբովյանի դիահերձարանում զինվորականների աճյունների հանդեպ վերաբերմունքի առնչությամբ արդարացում չի տեսնում, սակայն վստահեցնում է, որ դա մասնավոր դեպք է, այլ տեղերում նման պատկեր չկա:

«Արմենպրես»-ի հաղորդմամբ՝ փոխնախարարն այս մասին վստահեցրեց ԱԺ արտահերթ նիստում՝ պատասխանելով պատգամավորների հարցերին:

Անդրադառնալով անկախ պատգամավոր Տիգրան Ուրիխանյանի հարցին, թե ով է պատասխան տալու դեպքի համար՝ փոխնախարարն ասաց. «Դեպքի հետ կապված արդարացումներ չկան, ոչ ոք չի փորձում արդարացնել եղելությունը: Ես վստահ եմ, որ դա մասնավոր դեպք է և չի կրում համակարգային բնույթ: Քրեական գործ է հարուցվել այդ մասով, թող քննություն գնա, մեղավորներն իրենց արժանի պատիժը կրեն»:

«Բարգավաճ Հայաստան»-ից Միքայել Մելքումյանն էլ նշեց, որ այն, ինչ կատարվել է, չի տեղավորվում բարոյականության տիրույթում: «Իսկ, եթե բարոյականության սահմաններում չի տեղավորվում, նշանակում է, որ դա պետք է բարոյական գին ունենա ՝ բացի նրանից, որ քրեական գործ է հարուցվել»,- ասաց պատգամավորն ու առաջարկեց նախարարի պաշտոնակատարի հետ փոխնախարարը հրաժարական տա՝ անկախ նրանից հարցը փոխնախարարի տիրույթում է, թե ոչ:

Փոխնախարարն արձագանքեց՝ համաձայն չէ՝ շեշտելով, որ դեպքը, սակայն, արդարացում չունի: «Ես ժողովրդի վրդովմունքն ամբողջությամբ կիսում եմ»,- ասաց նա:

Անդրադառնալով անկախ պատգամավոր Թագուհի Թովմասյանի հարցին, թե ինչ եզրահանգման են եկել, ինչու են դիերն անարգվել Հայաստանում՝ փոխնախարը տեղեկացրեց, որ լուսանկարները հրապարակվելու օրը նախարարությունը հրատապ կարգով բոլոր դիահերձարաններ մարդիկ է ուղարկել՝ օպերատիվ իրավիճակը գնահատելու: «Իրավիճակը գնահատվել է, և կարող եմ պատասխանատվությամբ ասել, որ նման պատկեր միայն այդտեղ է եղել, դա մասնավոր դեպք է եղել: Դեպքը եղել է տեխնիկական օբյեկտիվ պատճառների արդյունքում, բայց, բնականաբար, տեխնիկական խնդիրը չէր նշանակում, որ նման լուծում պետք է տրվեր այդ հարցին: Սառնարանի կահավորման խնդիր է եղել, ժամանակավոր տեղափոխություն են արել, և նման պատկեր ենք ունեցել, որը անթույլատրելի է: Մնացած տեղերի մասով, պատասխանատվությամբ ասում եմ, որ նման պատկեր չկա, նման խնդիր չի կարող լինել»,-ասաց Սիմոնյանը:

Ավելի վաղ համացանցում լուսանկարներ էին հայտնվել, որոնք փաստում էին, որՀՀ առողջապահության նախարարության «Դատաբժշկական գիտագործնական կենտրոն» ՊՈԱԿ-իԱբովյանի մասնաճյուղումԱրցախյան 44-օրյա պատերազմում զոհված զինվորների դիեր են եղել, որոնք պահվել ենոչ պատշաճ պայմաններում:

Հունիսի 2-ին ՊՈԱԿ-ի Աբովյանի մասնաճյուղի վարիչը և Արցախյան պատերազմի ընթացքում զոհված զինծառայողների դիերի և մասունքների պահման գործընթացում ընդգրկված երկու աշխատակից ազատվել են աշխատանքից: