ԼՀԿ-ն միացել է ԱԺ արտահերթ նիստ հրավիրելու համար նախաձեռնված ստորագրահավաքին

ԵՐԵՎԱՆ, 14 ՄԱՅԻՍԻ, ԱՐՄԵՆՊՐԵՍ: ՀՀ ազգային ժողովի «Լուսավոր Հայաստան» խմբակցությունը միացել է արտահերթ նիստ գումարելու համար «Բարգավաճ Հայաստան»-ի նախաձեռնած ստորագրահավաքին՝ քննարկելու սահմանային իրավիճակը: «Արմենպրես»-ի հաղորդմամբ՝ այս մասին ասուլիսում ասաց ԼՀԿ ղեկավար Էդմոն Մարուքյանը:

«Առանց մեր ստորագրությունների արտահերթ նիստ չի կարող հրավիրվել: Արդեն ստորագրել ենք, որ արտահերթ նիստը հրավիրվի»,-ասաց Մարուքյանը:

Նրա խոսքով՝ նիստում պետք է քննարկվի Սյունիքում, Գեղարքունիքում ստեղծված իրավիճակը: «Առիթն այն է, որ հանդիպենք, քննարկենք, հրավիրենք համապատասխան մարմինների պատասխանատուներին, հարցեր տանք նրանց և տեղեկատվություն փոխանակենք: Խորհրդարանը չի կարող անմասն լինել երկրում առկա այս ճգնաժամի լուծման գործում»,-ասաց Մարուքյանը:

Նրա խոսքով՝ կա նաև հայտարարության նախագիծ, որով դատապարտվում է ադրբեջանական կողմի ագրեսիան:

Մարուքյանը չբացառեց, որ նիստը փակ լինի: Սակայն այս պահին նիստի գումարման մասին տեղեկություն չկա, դեռ պետք է լինի ԱԺ խորհրդի նիստ, եթե խորհուրդը որոշի գումարել արտահերթ նիստ, նոր այն կգումարվի: «Ընթացակարգերն այնպիսին են, որ անհնար լինի ընդդիմության կողմից արագ նիստեր հրավիրել»,-կարծիք հայտնեց Մարուքյանը:

Ավելի վաղ «Բարգավաճ Հայաստան» խմբակցությունը հայտնել էր, որ հաշվի առնելով Սյունիքում, Գեղարքունիքում և ՀՀ սահմանամերձ գոտիներում ստեղծված ճգնաժամային իրավիճակը, հանդես են գալիս ԱԺ արտահերթ նիստ հրավիրելու նախաձեռնությամբ։

Մայիսի 12-ից Ադրբեջանի զինված ուժերի զինծառայողների որոշ խմբեր հատել են Հայաստանի պետական սահմանը և Սև լիճը պարփակելուն ուղղված գործողություններ են արել: Հայաստանի զինված ուժերը մարտավարական բնույթի հակագործողություններ են իրականացրել:

Հարակից որոշ տարածքներում դիրքավորված ադրբեջանցիները հայկական զինուժի մարտավարական հակագործողությունների արդյունքում հեռացել են զբաղեցրած բնագծերից: Ոչ Հայաստանի, ոչ Ադրբեջանի զինուժի ներկայացուցիչների կողմից այս պահի դրությամբ հրազենի կամ այլ զինատեսակի կիրառմամբ դեպք չի գրանցվել: Միաժամանակ ադրբեջանական զինուժի շուրջ 250 ներկայացուցիչներ շարունակում են գտնվել ՀՀ պետական սահմաններից ներս՝ Սյունիքի և Գեղարքունիքի մարզերի որոշ հատվածներում: