Ռումինացի պատգամավորը ողջունել է Հայոց ցեղասպանության մասին Ջո Բայդենի ուղերձը

ԵՐԵՎԱՆ, 26 ԱՊՐԻԼԻ, ԱՐՄԵՆՊՐԵՍ: Ռումինիայի իշխող կոալիցիայի մաս կազմող PNL կուսակցության ներկայացուցիչ, Ռումինիայի Պատգամավորների պալատի պատգամավոր Դանիել Գեորգեն ողջունել է ԱՄՆ նախագահ Ջո Բայդենի հայտարարությունն ու իր զորակցությունը հայտնել հայ ժողովրդին:

«Ես ողջունում է Ջո Բայդենի՝ Հայոց ցեղասպանությունը ճանաչելու որոշումը: Ցեղասպանությունը կատարվել է 106 տարի առաջ Օսմանյան կայսրության ուժերի կողմից ընդդեմ հայերի և դա շարունակում է մնալ սարսափելի պահ 20-րդ դարի պատմության մեջ: Եկեք հարգենք անմեղ զոհերի հիշատակը և երբեք չմոռանանք մարդկության դեմ կատարված հանցագործությունները, որոնք արյունոտեցին մարդկության ոչ վաղ անցյալը: Մենք չենք մոռանա դա և մենք մեր հիշողություններում ընդմիշտ կպահենք հայ ժողովրդի հետ կատարված ողբերգությունը»,- «Արմենպրես»-ի հաղորդմամբ, «Ֆեյսբուք» սոցիալական ցանցի իր էջում նշել է Դանիել Գեորգեն:

Օսմանյան կայսրության կողմից 1915թ. հայերի նկատմամբ իրականացված ցեղասպանությունը 20-րդ դարասկզբի մեծագույն ոճրագործությունն էր: Աշխարհասփյուռ հայությունը նշում է Հայոց ցեղասպանության 106-րդ տարելիցը: Ցեղասպանությունը ճանաչել և դատապարտել է մոտ երեք տասնյակ պետություն: