Միասին աշխատենք Թուրքիայի կողմից Ցեղասպանության ճանաչման համար. Բուր-լը-Վալանսի քաղաքապետի ուղերձը

ԵՐԵՎԱՆ, 24 ԱՊՐԻԼԻ, ԱՐՄԵՆՊՐԵՍ: Միասին պետք է աշխատել Թուրքիայի կողմից Ցեղասպանության ճանաչման համար և ձեռք ձեռքի պայքարել ժխտողների դեմ: «Արմենպրես»-ին տրամադրած տեսաուղերձում այս մասին նշում է Բուր-լը-Վալանսի քաղաքապետ Մարլեն Մուրիեն:

«Չնայած այսօր կորոնավիրուսի պատճառով մեր կյանքում ստեղծված բարդ իրավիճակին և Հայոց ցեղասպանության 105-րդ տարելիցի հիշատակման արարողությանը ֆիզիկապես ներկա գտնվելու անհնարինությանը՝ 1915թ. թուրքական պետության զոհը դարձած 1.5 մլն հայերին հարգանքի տուրքը մատուցելն ինձ համար առանցքային նշանակություն ունի։ Նույնիսկ եթե այս ապրիլի 24-ին առողջապահական նկատառումներով մեկուսացման հետևանքով երթ կամ հավաք չի լինելու, ուզում եմ ձեզ ասել, որ ոչինչ չի խաթարում հանուն արդարության մեր պահանջներին, մենք չենք դադարի բոլորս միասին աշխատել Թուրքիայի կողմից Ցեղասպանության ճանաչման համար և ձեռք ձեռքի պայքարելու ենք ժխտողների դեմ»,-նշել է քաղաքապետը:

Մարլեն Մուրիեն իր խոսքում հիշատակել է Սևրի պայմանագիրը, որի հարյուրամյակն է լրանում այս տարի՝ 2020 թ.-ին: Նրա խոսքով, այս տարին պետք է լինի պայքարի տարի, ամեն օրը՝ ապրիլի 24-ի հիշողության օր՝ ի հիշատակ 20-րդ դարի առաջին ցեղասպանության զոհերի:

«Ինչպես ամեն տարի, ես ձեր կողքին եմ՝ հավատարիմ աջակիցը ձեր պայքարի և մեր ընդհանուր արժեքների։ Վերջապես, իմ մտքում է հայ ժողովուրդը Հայաստանում և Արցախում, որ նույնպես տուժում է կորոնավիրուսից։ Նույնիսկ եթե գիտեմ, որ մեր բարեկամները Հայաստանում և Արցախում ի սկզբանե լավ էին պատրաստվել վիրուսի կանխմանը՝ անմիջապես կանխարգելիչ միջոցների ներդրման, մեկուսացման, ամբողջ բնակչության համար մեծ քանակությամբ դիմակների պատվերների միջոցով, իմ ուղերձում, ինչպես որ անդադար ասում եմ իմ համաքաղաքացիներին, ուզում եմ նրանց հորդորել մնալ տանը և հատկապես հոգ տանել իրենց և իրենց հարազատների մասին»,-հավելել է նա:

Օսմանյան կայսրության կողմից 1915թ. հայերի նկատմամբ իրականացված ցեղասպանությունը 20-րդ դարասկզբի մեծագույն ոճրագործությունն էր: Աշխարհասփյուռ հայությունը նշում է Հայոց ցեղասպանության 105-րդ տարելիցը:Ցեղասպանությունըճանաչելևդատապարտելէմոտ երեք տասնյակ պետություն, այդ թվում Ֆրանսիան, որը ճանաչման և դատապարտման մի քանի որոշում ու բանաձև ունի: 2019թ. ապրիլի 10-ին Ֆրանսիայի նախագահ Էմանուել Մակրոնը հրամանագիր է ստորագրել ապրիլի 24-ը Հայոց ցեղասպանության հիշատակի ազգային օր ճանաչելու մասին: